Joshy hannyń qaıda jerlengenin ózgelerdiń bilmeýi ózimizdiń kemshiligimiz - mınıstr

ASTANA. QazAqparat - Álemdik qoǵamdastyqtyń Joshy hannyń qazaq jerinde jerlenýin bilmeýi bizdiń úlken kemshiligimiz. Mundaı pikirdi búgin Úkimet úıinde ótken baspasóz máslıhatynda QR Mádenıet jáne sport mınıstri Arystanbek Muhamedıuly bildirdi, dep habarlaıdy QazAqparat.

«Men úshin Altaı Qazaqstannyń biregeı marjany sanalady. Nıkolaı Rerıh te Shambala taýly Altaıda turǵandyǵyn aıtqan edi. Dál osy jaıt úlken qyzyǵýshylyq týdyrdy. Ótken jyly biz onyń sýret kórmesin ótkizdik. Onyń jumystarynyń kópshiligi Shyǵys Qazaqstandaǵy qasıetti jerlerge arnalǵan», - dedi Arystanbek Muhamedıuly.

Sonymen qatar ol álemdik qaýymdastyq bilip, tanýy tıis Qazaqstandaǵy qasıetti oryndardyń biri retinde Ulytaýdy atady.

«Onda Joshyhannyń mavzoleıi bar. Sheteldik kelýshilerge Joshy han mazaryn kórsetkende olar tań qalady. Shyńǵys hannyń úlken ulynyń Qazaqstanda jerlenýi búkil álemde zor qyzyǵýshylyq týdyrady. Al muny álemdik qoǵamdastyqtyń bilmeýi bizdiń úlken kemshiligimiz», - dedi mınıstr.

Onyń atap ótýinshe, qazirgi ýaqytta elimizdegi týrıstik salany damytýǵa iri halyqaralyq ınvestorlar da qyzyǵýshylyq tanytýda.

«Máselen, Memleket basshysy taıaýda AQSh-qa jasaǵan sapary barysynda Gollıvýdtaǵy amerıkalyq kınoındýstrııa basshylarymen kezdesti. Olar Qazaqstanda jumys isteýge aıryqsha qyzyǵýshylyq tanytyp otyr», - dedi ol.