Joshynyń aınalasyndaǵy tartys ǵylymǵa paıdaly – Májilis depýtaty

<p>ASTANA. KAZINFORM &ndash; Májilis depýtaty, tarıh ǵylymdarynyń doktory Erkin Ábil Astanada ótip jatqan &laquo;Joshy, Shaǵataı, Haıdý ulystary men Moǵolstannyń etnosaıası tarıhy&raquo; atty halyqaralyq konferentsııa kezinde Joshy ulysynyń tarıhyna qatysty halyqaralyq pikirtalastar týraly pikir bildirdi.</p>

«Eýrazııa ǵalymdarynyń arasynda Joshy ulysynyń tarıhy boıynsha aýyzbirlik bar ma? Reseı ǵalymdary ózine, qazaq ǵalymdary ózine, monǵol ǵalymdary ózine tartatyn sııaqty. Shyndyq kimniń jaǵynda?» - dep surady jýrnalıst konferentsııa kýlýarynda.

Depýtattyń aıtýynsha, ondaı pikirtalastyń toqtamaǵany mańyzdy.

«Árıne, pikirtalas kóp. Keıbir másele boıynsha ymyra tabý qıyn. Biraq ǵylymda eshqashan birtutas paıym degen bolmaıdy. Ondaı keńes zamanynda ǵana bolǵan. Bári bir tujyrymdamaǵa ılanýy kerek bolatyn. Siz aıtqan pikirtalastyń bolǵany da jaqsy. Óıtkeni ǵylym dıskýssııa arqyly damıdy. Pikirtalastar arqyly bir paıymǵa kelýge bolady», - deıdi ol.

Erkin Ábil Joshy ulysyn ulyqtaý qazaq rýhanııatyna ne beretinin de aıtty.

«Qazaq halqynyń qalyptasý kezeńi Joshy ulysynyń dáýirinde boldy. On úshinshi ǵasyrdan bastap on besinshi ǵasyrǵa deıin qazaq tiliniń, rýhanı-materıaldyq mádenıetiniń negizi, ulttyq sanasy qalyptasty. Bizge jetken batyrlar jyry, shejireler, tarıhı dastandar, qazaqtyń «qazaq» dep atalýy osy Joshy ulysynyń quramynda júrgende boldy. Joshy ulysynyń sońǵy ókili Kenesary han deýge bolady. Sondyqtan qazaq tarıhynyń úzilmegenin, memlekettiligi ózeginen aıyrylmaǵanyn Joshy ulysynyń tarıhynan kórýge bolady», - dedi depýtat.