JOO ustazy: Búgingi kúni qoǵam múshelerine belsendilik jetispeıdi

ALMATY. QazAqparat - Ál-Farabı atyndaǵy Qazaq ulttyq ýnıversıtetiniń hımııa jáne hımııalyq tehnologııa fakýlteti dekanynyń oqý isi jáne áleýmettik qyzmet jónindegi orynbasary Leıla Kýdreeva «Nur Otan» partııasynyń kezekten tys HHІ sezine qatysty pikir bildirdi, dep habarlaıdy QazAqparat tilshisi.

Onyń aıtýynsha, qarapaıym halyq, ásirese, qańtardaǵy oqıǵadan keıin bılik partııasynyń sheshimin biraz tolǵanyspen kútti.

«Prezıdent «Nur Otan» partııasynyń qoǵamdaǵy rólin arttyrý asa mańyzdy ekenin atap ótti. Sonymen qatar, syn saǵatta partııanyń alyp kúshi paıdalanbaı qalǵanyna ókinish bildirdi. Memleket basshysy «qańtar qasireti» jastardyń áleýmettik- ekonomıkalyq turǵyda beıimdelýinde jibergen kemshilikti anyq kórsetkenin basa aıtty», - deıdi Leıla Kýdreeva.

Ustazdyń sózinshe, búgingi kúni qoǵam múshelerine belsendilik jetispeıdi.

«Shynynda da, bizge, jalpy qoǵam múshelerine belsendilik jetispeıdi. Bir-birimizdiń máselemizge bas aýyrtqymyz kelmeıdi. Qazir qos dıplomy bar jastardyń deni jumyssyz. Jumysy bolmaǵan soń olar jaman ádetke áýes keledi. Óz basym Prezıdenttiń «jastardy tehnıkalyq mamandyqtarǵa baýlý kerek» degen usynysyn qoldaımyn. Óıtkeni bizdiń qoǵam bilikti ınjenerlerge, tehnıkterge, taǵy basqalaryna óte zárý. Áli kúnge deıin munaıgaz sektory kásibı tehnık mamandardy syrttan aldyrady. Osyndaı kemshilikterdi joıý úshin otandyq mamandardy ózimiz molynan, qajettilikti óteıtindeı deńgeıde daıarlaýymyz kerek. Oǵan bizdiń eldiń múmkinshiligi de, qýaty da jetedi. Tek elimizdiń bolashaǵy jastardyń taǵdyryna beı-jaı qaraýdan arylýymyz kerek. Sonda ǵana naqty nátıjege jetemiz», - deıdi spıker.

Foto: www.kaznu.kz