JOO sertıfıkatyn alǵan sarbazdar eki jyl ishinde qujat tapsyrýy kerek – mınıstrlik
Búgin alǵash ret merzimdi qyzmet sarbazdaryn JOO-ǵa irikteý konkýrsy qorytyndylandy. 2022 jylǵy kóktemde shaqyrylǵan 1500 sarbaz JOO-da tegin bilim alý sertıfıkatyn jeńip aldy.
«Ǵylym jáne joǵary bilim mınıstrligi bekitken qabyldaýdyń tıptik erejelerine sáıkes, sarbaz merzimdi qyzmetin aıaqtaǵan soń eki jyl ishinde JOO-ǵa bara alady. Árıne, tegin oqý sertıfıkatyn alǵandarǵa ýaqyt joǵaltpaı, birden oqýǵa barýyna keńes beremiz», - dedi QR Qorǵanys mınıstriniń keńesshisi Aıgúl Tólembaeva Ortalyq kommýnıkatsııalar qyzmetinde.
Onyń aıtýynsha, Otan aldynda boryshyn ótegenderge tegin bilim berý jóninde ázirge 76 oqý ornymen kelisimshart bekitilgen.
Árbir JOO óz qalaýynsha grant bólip, mamandyqtar tizimin de ózderi usynady. Ár sarbaz úsh ýnıversıtetti tańdaı alady. Іrikteý yńǵaıly ári ashyq ótýi úshin «Srochnıkı 2.0» tsıfrlyq platformasy engizilgen.
«Búgin tegin sertıfıkat ıegerleri anyqtaldy jáne qorytyndyǵa apellıatsııa múmkindigi qarastyrylmaǵan. Sebebi aqparattyq júıe áskerı bólimder bergen aqparatqa súıenip, qorytyndy shyǵardy. Ony esh ózgertýge bolmaıdy. Platformanyń da qorǵaý deńgeıleri joǵary, ony buzý, nátıjelerin ózgertý múmkin emes. Keıde joǵary ball alǵan sarbaz eshqaıda túspeı qalady, al azyraq upaı alǵandardyń joly bolyp ketedi. Bul sarbazdyń ózi tańdaǵan oqý oryndaryna tikeleı baılanysty – kósh basynda turǵan TOP ýnıversıtetterdi tańdasa, báseke de joǵary bolady. Búgingi kúnge deıin árbir sarbaz ózi tańdaǵan oqý oryndaryn aýystyrýǵa, qaıta tańdaýǵa quqyly boldy. Mysaly bireýi áskerı JOO tańdap, keıinnen azamattyq oqý oryndaryn qaıta tańdady», - dep túsindirdi A. Tólembaeva.
Aıta keteıik, 2022 jylǵy kúzde shaqyrylǵandar úshin kvotanyń ekinshi bóligi osy jyldyń kúzinde ótedi.