JOO oqý baǵdarlamasyna onlaın saýda kýrsy engizilýi múmkin

ASTANA. QazAqparat – Qazaqstanda joǵary oqý oryndarynyń bilim berý baǵdarlamasyna onlaın saýda kýrsyn engizý jaǵy qaralyp jatyr. Atalǵan derekti Ǵylym jáne joǵary bilim mınıstri Saıasat Nurbek keltirdi, dep habarlaıdy QazAqparat tilshisi.

«Elimizde onlaın saýdany ilgeriletý jáne halyqtyń qarjylyq saýattylyǵyn arttyrýda áriptestik baǵytta jumys isteýge daıynbyz. Óz kezegimizde oqý, biliktilikti arttyrý jaǵynan qol ushyn soza alamyz. Ótken jyly bizde óte jaqsy bastama qolǵa alyndy – onlaın saýda boıynsha kýrs ázirlep, keıin ony ýnıversıtetterdiń oqý baǵdarlamasyna engizý. Buǵan deıin aıtqanymdaı, saýda salasy kún sanap damyp keledi. Qazir túrli saýda alańdary men onlaın saýda qyzmetteri bar. Kerek dúnıeni úıde otyryp-aq satyp alýǵa bolady», - dedi Saıasat Nurbek elordada ótken elektrondyq kommertsııa mektebiniń jumys qorytyndysyna arnalǵan shara barysynda.

Mınıstrdiń boljamynsha, bolashaqta saýda jasaýǵa bir jerge barýdyń qajeti bolmaýy da múmkin.

Joǵary bilim salasyndaǵy taǵy bir jańashyldyq – ýnıversıtetter qabyrǵasynda stýdentterdiń qarjylyq saýattylyǵyn arttyrý jáne ınternet alaıaqtyqtan saq bolýǵa úıretetin kýrstar paıda bolady. Mınıstr qarjylyq saýattylyqtyń taıazdyǵy keı kezde qaıǵyly jaǵdaıǵa dýshar etetinine de toqtalyp ótti.

«Ókinishke qaraı, qumar jáne onlaın oıyndarǵa úıir, utys tigetin jáne onlaın kredıt alatyn azamattardyń sany azaımaı tur. Ásirese, jastar arasynda. Keıbir jaǵdaıda qarjylyq saýattylyǵy taıaz azamattar atalǵan uıymdardyń aldaýyna túsip qalyp jatady. Nátıjesinde tyǵyryqtan shyǵý jolyn tappaǵan jastar sýıtsıdke qadam basady», - deıdi vedomstvo basshysy.