JOO-nyń úzdik oqytýshylary 6 mln teńgeden syıaqy aldy

ASTANA. QazAqparat - «2022 jylǵy Joǵary oqý ornynyń úzdik oqytýshysy» konkýrsy jeńimpazdarynyń esimderi belgili boldy. Qazaqstandyq 43 JOO-nyń 150 oqytýshysy jeńimpaz atandy. Bul týraly QazAqparat Ǵylym mınıstrligine silteme jasap habarlaıdy.

Olardyń árqaısysy 2000 AEK kóleminde syıaqy alatyn bolady, bul shamamen 6 mln teńgeni quraıdy. Aqshalaı yntalandyrýdan basqa «2022 jylǵy Joǵary oqý ornynyń úzdik oqytýshysy» konkýrsynyń jeńimpazdary tósbelgige ıe bolady.

Konkýrs jyl saıyn oqytýshy kásibiniń bedelin arttyrý jáne olardy odan ári kásibı damytýǵa yntalandyrý maqsatynda ótkiziledi.

«Konkýrsqa elimizdiń 71 joǵary oqý ornynan barlyǵy 775 úmitker qatysty. Konkýrsta elektrondy oqý resýrstaryn, oqý materıaldaryn ázirleý jáne jarııalaý, otandyq jáne halyqaralyq jýrnaldardaǵy ǵylymı jarııalanymdar, ónertabysqa patentterdiń bolýy jáne t.b. sııaqty kórsetkishter, sondaı - aq úmitkerdiń oqytý sapasy, onyń bakalavrıatta, magıstratýrada jáne doktorantýrada kadrlar daıarlaý jónindegi eńbegi baǵalandy»,-dedi Ǵylym jáne joǵary bilim vıtse-mınıstri Qýanysh Erǵalıev.

Aıta keteıik, konkýrs QR ǴJBM aqparattyq júıesiniń bazasynda ótti, onyń kómegimen qatysýshylar barlyq kezeńderdiń ashyqtyǵyn baqylaı aldy. «2022 jylǵy Joǵary oqý ornynyń úzdik oqytýshysy» konkýrsyna qatysý úshin ótinimder men qujattar da elektrondyq formatta qabyldandy. Bul konkýrsty ótkizýdiń ashyqtyǵyn qamtamasyz etti. Sondaı-aq, komıssııa quramyna ÚEU, JOO qaýymdastyqtarynyń ókilderi jáne bilim berý salasyndaǵy sarapshylar engizildi.