JOO-larda pedagogıkalyq oqý baǵdarlamasyn jańǵyrtý qajet - Qasym-Jomart Toqaev

<p>Memleket basshysy Qasym-Jomart Toqaev Respýblıkalyq pedagogter sezindegi baıandamasynda bilim berý salasyna qatysty birqatar mańyzdy máselege toqtaldy, dep habarlaıdy QazAqparat Aqordanyń baspasóz qyzmetine silteme jasap.&nbsp;</p>

«Birinshi másele. Ustazdardyń biliktiligin arttyrýymyz kerek.

Maǵjan Jumabaev «Alty Alashtyń balasy bas qossa, tór – muǵalimdiki» degen. Halqymyz keleshektiń kilti – bilimde ekenin tereń túsingen. Sol sebepti, ustazdy erekshe qadirlegen.

Pedagog – ulttyń jańa sapasyn qalyptastyrý úderisindegi eń mańyzdy býyn. Sondyqtan bilim berý júıesin joǵary bilikti mamandarmen tolyq qamtamasyz etý óte mańyzdy.

Alaıda qazir mektepterimizde mamandar tapshy. Búginde elimizde 5 myń pedagog jetispeıdi. Bul kórsetkish jyldan-jylǵa artyp keledi. Al pedagogıka salasynda oqyǵan árbir besinshi túlek óz mamandyǵy boıynsha jumys istemeıdi. Buǵan qosa muǵalimderdiń 23 paıyzynda ǵana joǵary biliktilik sanaty bar.

Munyń bári pedagogterdi daıarlaý jáne olardyń biliktiligin arttyrý tásilderin túbegeıli ózgertýdi qajet etedi. Joǵary oqý oryndaryndaǵy pedagogıkalyq mamandyqtarǵa qatysty baǵdarlamalardyń basym bóligi zaman talabyn eskermeıtin burynǵy ádistemelerge negizdelgen. Zamanaýı tásilder men tehnologııany engize otyryp, oqý baǵdarlamalaryn qaıta qaraý, jańǵyrtý qajet», - dedi QR Prezıdenti. 

Sondaı-aq, Memleket basshysy pedagogterdiń biliktiligin baǵalaý jáne arttyrý júıesin jańǵyrtý qajet ekenin atap ótti. 

«Joǵary kýrs stýdentteriniń pedagogıkalyq tájirıbesine aıryqsha mán beriledi. Bolashaq muǵalimder naqty bilim berý úderisine barynsha tereń boılaý úshin joǵary oqý oryndary mekteptermen tyǵyz qarym-qatynasta jumys isteýi qajet.

Jyl saıyn elimizde magıstr dárejesin alǵan biliktiligi joǵary pedagogterdiń qatary artyp keledi. Qazir tańda olardyń sany 21 myńnan asty. Olar – bilim berý isine ozyq ádisterdi engize alatyn kásibı mamandar. Jańa tıptegi bilim berý uıymdarynyń bolashaq basshylarynyń negizgi quramy osyndaı mamandardan jasaqtalady. Jalpy, pedagogterdiń biliktiligin baǵalaý jáne arttyrý júıesin jańǵyrtý qajet», - dedi ol.

Odan bólek, salalyq mınıstrlik biliktilik talaptaryn jıi ózgertý arqyly oqytýshylarǵa qysym jasaýdy toqtatýy kerek ekenin eskertti. 

«Sonymen qatar salalyq mınıstrlik biliktilik talaptaryn jıi ózgertý arqyly oqytýshylarǵa qysym jasaýdy toqtatýy kerek ekenin aıtqym keledi. Oıyna ne kelse, sony isteıtin sheneýnikterdiń júgensizdigine tosqaýyl qoıý qajet. Muǵalimder tynysh, turaqty jáne alańsyz jumys isteýge quqyly.

Pedagog kadrlardyń 60 paıyzǵa jýyǵy óńirlik joǵary oqý oryndarynda daıarlanady. Sondyqtan óńirler deńgeıinde jas muǵalimderdi qoldaýdyń mańyzy zor. Ákimder pedagogterdi daıarlaý jáne jumysqa ornalastyrý úshin qolaıly jaǵdaı jasaýy kerek», - dedi Qasym-Jomart Toqaev.