JOO-larda oqytý tiline qaramastan Kásibı qazaq tili páni engizilýi múmkin

ASTANA. QazAqparat – Joǵary oqý oryndarynda oqytý tiline qaramastan, «Kásibı qazaq tili» páni engizilýi múmkin. Bul týraly Premer-Mınıstrdiń orynbasary Altaı Kólginov Májilis depýtattarynyń qazaq tilindegi zańnamanyń sapasyn arttyrý týraly saýalyna bergen jaýabynda aıtty, dep habarlaıdy QazAqparat tilshisi.

Vıtse-Premerdiń sózine qaraǵanda, termın túzýge mamandanǵan ǵylymı sektsııalar qurylmaq.

«Ǵylym jáne joǵary bilim mınıstrligi quramyna memlekettik organdardyń qyzmetkerleri men ǵalymdar tartylatyn salalyq termınologııalyq sektsııalar qurý baǵytynda jumys júrgizýde. Bul shara Respýblıkalyq termınologııa komıssııasy bekitetin termınderdiń sapasyn arttyrýǵa yqpal etedi. Termınologııalyq sektsııalar keıinnen normatıvtik termınologııalyq sózdikterdi ázirleý jumystaryna da tartylady», - dep jalyzǵan jaýapta.

Altaı Kólginovtiń aıtýynsha, joǵary oqý oryndarynda «Kásibı qazaq tili» páni engizili múmkin.

«Mınıstrlik mektep termınologııasyn damytý, resmı qujattardyń stılıstıkasyn jetildirý, oqytý tiline qaramastan joǵary oqý oryndarynyń baǵdarlamasyna «Kásibı qazaq tili» pánin engizý, sondaı-aq qazaq tiliniń ǵylymı, resmı-iskerlik stılderin damytý máseleleri boıynsha ǵylymı zertteýler júrgizý máselelerin pysyqtaýda. Jalpy, atalǵan baǵyttaǵy jumystar múddeli memlekettik organdarmen kelisý satysynda turǵan jáne zańnamada belgilengen tártippen bekitiletin Qazaqstan Respýblıkasyndaǵy til saıasatyn damytýdyń 2023-2029 jyldarǵa arnalǵan tujyrymdamasynyń jobasynda kózdelgen.