JOO-lar janynan kópbeıindi ýnıversıtettik aýrýhana men klınıka ashylady - mınıstrlik
16:26, 03 Qyrkúıek 2022
NUR-SULTAN. QazAqparat – Búgin ótken Úkimet otyrysynda densaýlyq saqtaý mınıstri Ajar Ǵınııat Memleket basshysynyń Joldaýy aıasynda berilgen tapsyrmalardy júzege asyrý sharalaryn baıandady, dep habarlaıdy QazAqparat vedomstvonyń baspasóz qyzmetine silteme jasap.
Mınıstr málim etkendeı, Memleket basshysynyń dáriger daıarlaýdy jetildirý jónindegi tapsyrmasyna oraı, úsh medıtsınalyq joǵary oqý ornynyń janynan kópbeıindi ýnıversıtettik aýrýhana men klınıka ashý qarastyrylyp otyr.
Ajar Ǵınııattyń aıtýynsha, aldaǵy úsh jyl ishinde rezıdentýraǵa bólinetin grant sanyn jyl saıyn 70%-ǵa deıin – 2023 jyly 1 myń 700-den 2025 jyly 3 myń 400-ge deıin ulǵaıtý josparlanyp otyr.
Vedomstvo basshysy densaýlyq saqtaý mınıstrligi Memleket basshysynyń 1 qyrkúıektegi «Ádiletti memleket. Birtutas ult. Berekeli qoǵam» Joldaýynda berilgen barlyq tapsyrmalaryn belgilengen ýaqytta oryndaıtynyn atap ótti.