JOO-lar mamandar boıynsha eńbek naryǵy suranysyna baǵdardy joǵaltty - Bas prokýratýra

ASTANA. QazAqparat - Keı jaǵdaılarda JOO-lar bilim sapasyn ekinshi orynǵa ysyryp qoıyp jatady. Bul týraly búgin Astanada «Qazaqstan Respýblıkasynda zańger mamandardy daıarlaý týraly» respýblıkalyq forýmda QR Bas prokýrorynyń orynbasary Andreı Kravchenko málim etti.

«Táýelsizdik jyldarynda JOO-lar sany eki esege artyp, stýdentter sany 473 myńǵa jetti. Bundaı kórsetkishter adamı kapıtaldy damytýda jetistik bolyp esepteledi, jan basyna shaqqanda JOO sany boıynsha biz bilim salasyndaǵy kóshbasshy Ulybrıtanııa sekildi elden asyp tústik», -dep toqtaldy ol. A. Kravchenkonyń sózine qaraǵanda, tekserilgen jeke JOO-lardyń tórtten úsh bóligi memlekettik jalpy bilim berý standarttaryn oryndamaı otyr. Sonymen birge 90 paıyzdan astamynda oqytýshylary jetkiliksiz, al bilikti oqytýshylardyń úshten bir bóligi birmezgilde birneshe JOO-da qyzmet etýde. «Batys Qazaqstan oblysyndaǵy joǵary oqý ornynyń birinde ǵylymı dárejeli 160 oqytýshy bar, onyń arasyndaǵy 48 ǵylym doktory ol jerde eshqashanda jumys istemegen. Jeke JOO-lardyń kóbisinde materıaldyq-tehnıkalyq bazasy men kitaphanasy nashar jasaqtalǵan. Bul óz kezeginde bilimniń sapasyna áser etpeı qoımaıdy. Degenmen de problemalar memlekettik JOO-larda da bar. Olar sońǵy eki jylda ákimshilik jaýapkershilikke 102 ret tartyldy», - dedi ol. «Keı-keıde joǵary oqý oryndaryna aqsha, al stýdentterge dıplom ǵana kerek degen jaǵdaı qalyptasyp otyr, dep osy sózdi amalsyzdan aıtýǵa týra keledi. Bilim sapasy ekinshi maqsat-mindetke ketip jatatyn problema bar. JOO-lar ekonomıka salalaryna qaraı negizdelip jatqan joq jáne eńbek naryǵy suranysyna baǵdardy joǵaltty», - dedi prokýror.