JOO qyzmetkerlerine jeńildetilgen baspana berý baǵdarlamasy týraly aqparat - feık

NUR-SULTAN. QazAqparat – Áleýmettik jelilerde taraǵan joǵary oqý oryndarynyń qyzmetkerlerine jeńildetilgen tártippen turǵyn úı berý baǵdarlamasy týraly aqparat shyndyqqa janaspaıdy. Bul týraly Ǵylym jáne joǵary bilim mınıstrligi málim etti, dep habarlaıdy QazAqparat tilshisi.

«19 shildede áleýmettik jelilerde mongov.kz saıtyna silteme jasaı otyryp, JOO qyzmetkerleri arasynda turǵyn úıge qajettilik tizimin jasaý úshin saýalnama toltyrý týraly aqparat tarady. Bul málimet shyndyqqa janaspaıdy. Atalǵan saıttaǵy aqparattan alaıaqtyq belgileri baıqalady. Sondaı-aq, ol joǵary oqý oryndarynyń qyzmetkerleri týraly jeke aqparat jınaý maqsatynda jasalǵan. Osyǵan baılanysty, Ǵylym jáne joǵary bilim mınıstrligi jalǵan aqparat taratpaýǵa shaqyrady. Mınıstrlik qandaı da bir jańalyqty habarlaý úshin resmı aqparat arnalaryn paıdalanady. Atalǵan oqıǵa boıynsha derekter quqyq qorǵaý organdaryna joldandy»,- delingen vedomstvo habarlamasynda.

Qosa keteıik, buǵan deıin Jetisý oblysynyń Sarqan aýdanynda turǵyndardyń jappaı sýdan ýlanyp jatqany týraly aqparattyń shyndyqqa janaspaıtynyn málim etken edik.