Jóndeýdi qajet etetin joldardy kompıýterlik baǵdarlama anyqtaıdy
17:00, 28 Maýsym 2017
ASTANA. QazAqparat - QR Investıtsııalar jáne damý mınıstrligi avtomobıl joldary komıtetiniń tóraǵasy Mereke Pishembaevtyń aıtýynsha, Qazaqstanda joldardyń sapasyna jaýap beretin ulttyq ortalyq qurylady. Oǵan barlyq oblystyq jol zertxanalary kiretin bolady. Osylaısha, jumystyń sanyna emes, sapasyna basa nazar aýdarylady. Bul - Dúnıejúzi bankiniń talaby, dep xabarlaıdy QazAqparat tilshisi.
"Ol ortalyq qalaı jumys isteıdi? Máselen, búginde qaı joldardy jóndeıtinimizdi kúzgi tekseristerge súıenip anyqtasaq, endigi kezekte ony arnaıy baǵdarlama anyqtaıtyn bolady. Ol baǵdarlamaǵa joldarǵa qatysty sońǵy on jyldyń barlyq málimetteri engiziledi. Sonyń negizinde jóndeý jumystaryn qajet etetin joldar anyqtalady. Osyǵan baılanysty barlyq sharalardy jyldyń aıaǵyna deıin aıaqtaý qajet. Sóıtip, kelesi jyldan bastap ulttyq ortalyq óz qyzmetine kirisýi tıis", - deıdi Pishembaev.
Aıta keteıik, búgin Astanada ótken baspasóz máslıxatynda komıtet basshysy taǵy 11 jolda qurylys jumystarynyń bastalatynyn málimdedi. Onyń aıtýynsha, úsh jyldan keıin aqyly joldardan 30 mlrd. teńge jınalady.