Joly jaqsynyń tabysy tolaǵaı - baspasózge sholý

ASTANA. QazAqparat - «QazAqparat» halyqaralyq aqparattyq agenttigi 26 jeltoqsan, juma kúni jaryq kórgen respýblıkalyq buqaralyq aqparat quraldaryndaǵy ózekti maqalalarǵa sholýdy usynady.

***

« Egemen Qazaqstan » basylymynyń búgingi sanynda Elbasynyń "Nurly jol" baǵdarlamasynda aıtylǵan jol qurylysyna qatysty máselelerdi eksheıtin « Joly jaqsynyń tabysy tolaǵaı » atty tolymdy maqala jarııalandy.

«Tranzıtke qolaıly ahýal or­natyp jatqan Qazaqstan, fızı­kalyq jáne t.b. kedergilerdi joıa oty­ryp, Shyǵys pen Batys ara­synda qurlyqtyq kópir retin­de ornyǵyp, Qytaıdyń ba­tysy­nan Eýropa, Reseı, Parsy shy­ǵa­naǵy, Ortalyq Azııa jáne Kav­kaz elderinen tasymaldanatyn taýarlarǵa jol ashty. Dese de, mem­lekettik strategııa kóz­dep otyr­­­ǵan ekonomıkanyń árta­rap­tan­­dyrylýy jáne osy jaǵdaı­men baılanysty jetkizilim tiz­beginiń qıyndaýy, Keden odaǵy sheńberinde básekelestiktiń artýy, otandyq ónimdi ǵalamdyq naryqqa qysylmaı jetkizý qajettiligi Qazaqstan ekonomıkasynyń kó­liktik-logıstıkalyq júıesin ja­ńa sapaly deńgeıge kóterýdi ta­lap etedi. Osyǵan oraı El­basy respýblıkanyń tıimdi stra­tegııasyn júzege asyrýda jańa mindetter júktedi. Bul strategııa joǵary básekelestik deńgeıine jetetin kóliktik-logıstıkalyq júıege qol jetkizýdi kózdeıdi. Bi­rinshi, elimiz Eýrazııalyq aımaq­tyń basty logıstıkalyq jáne tranzıttik kúshine aınalýy shart. Ekinshi, eksporttyq áleýet­ti ba­rynsha paıdalana otyryp, ult­tyq ekonomıkanyń ishki qajet­tilikterin óteý kerek. Úshinshi, halyqtyń osy jańa maqsatqa, qyzmetke beıimdiligin arttyrý asa qajet. Ol úshin dástúrli tar mekemelik tásilderden bas tartyp, kóliktik-logıstıkalyq júıeni qalyptastyrý men basqarýdyń qazirgi zamanǵy ádisin meńgergen jón. Kóliktik-logıstıkalyq bıznes sýbektileriniń, memlekettik ba­qylaý, kedendik-shekaralyq ákim­shilik organdarynyń, sondaı-aq, ınfraqurylym nysandarynyń ózara qarym-qatynas júıesin durys qura bilý mańyzdy. Osy maqsatqa qol jetkizý úshin Germanııa, AQSh, BAÁ men Sın­ga­pýrdyń eń ozyq álemdik táji­rıbesin naqty qol­danatyn kez keldi», - delinedi maqalada.

« Taýtulǵa » atty taqyryppen jarııalanǵan « Egemen Qazaqstannyń » kelesi materıalynda HH ǵasyrdyń basynda qazaqtyń mańdaıyna bitken ataqty saıypqyran saıasatker Turar Rysqulovqa arnalyp otyr.

«Eldegi asharshylyq pen ólim-jitim jóninde jandaıshaptar jaq ashpaı, Máskeýge barǵanda únsiz qalǵan. Qazaqstandaǵy jaǵdaıat jaıynda jarytymdy resmı másele qoıatyn eshkim tabylmaǵan da osy tus. Al ony batyryp ta, ashynyp ta aıtqan Rysqulov eken. Qaharman Rysqulov! Ol Stalın aldyna halyqty otyryqshylyqqa úıretý men sanyn azaıtpaý, ashtyqty joıý máselelerin qoıǵan. Úreıli tsıfrlar ne deıdi? «1932 jyldyń 5-6 qańtarynda Áýlıeata qalasyndaǵy shaıhanalardan 20 balanyń óligi jınalyp alynǵan jáne 84 eresek adam ólgen. Bir ǵana Sarysý aýdanyndaǵy 7000 úıden 500 úı qalǵan. Torǵaı aýdanynda 25 myń adam turatyn aýyldarynda egý jumystaryn nebári 1 adam ǵana júrgizgen. Balqash aýdanyndaǵy 60 myń halyqtyń 36 myńy qaza tapqan. Halyq ósimdik tamyrlary men usaq kemirýshilerdi, tipti, adam óligin jeýge deıin bardy», - dep jazady maqala avtory.

***

Keshe Qazaqstanda ındýstrııalandyrýdyń ekinshi «besjyldyǵy» bastaý aldy, dep jazady «Aıqyn» basylymy «Indýstrııa men ınnovatsııa - damýdyń «nurly joly» atty maqalasynda.

«Bul kúni Astanadaǵy Táýelsizdik saraıynda, Prezıdent Nursultan Nazarbaevtyń qatysýymen, birden úsh is-sharany biriktirgen «Indýstrııalandyrý kúni» ótti. Onyń birinshi bóliminde Premer K.Másimov pen Úkimet músheleri Prezıdenttiń «Altyn sapa», «Paryz» syılyǵyn betkeustar bıznesmender men otandyq ozyq kásiporyndarǵa tabystady. Sondaı-aq «Qazaqstannyń úzdik taýary» baıqaýynyń jeńimpazdaryn marapattady. Osydan keıin bastalǵan negizgi bó­limde «Qazaqstandy jańasha ındýstrııa­landy­rý: 2014 jyldyń jáne birinshi besjyldyq­tyń qorytyndylary» atty jalpyulttyq telekópir uıymdastyryl­dy. Telekópir ba­ry­synda Qazaqstan Kósh­bas­shysy «In­dýstrııalandyrý karta­sy­nyń» 15 jańa jobasyna ómirge joldama berdi», - delingen maqalada.

Astanadaǵy «Aray Madia Group» stýdııasy ertegiler men ańyzdardan turatyn «Juldyzdy ańyz-ertegiler» atty saıtty jasap shyqty. Bul týraly « Aıqyn » gazeti habarlaýda.

«Kúni keshe juldyzdar oqyǵan ertegiler toptastyrylǵan ertegiler.kz saıtynyń ta­nystyrylymy ótti. Bul joba «Nur Otan» partııasynyń «Balalyq shaq» atty baǵdar­lamasy aıasynda júzege asyp otyr», - delingen « Juldyzdar ertegi oqydy » atty maqalada.

Basylymnyń jazýynsha, ertegiler.kz saıty elimizdegi óner she­berleriniń qatysýymen daıyndalǵan qazaqtyń halyq ertegileri men ańyzda­rynyń biregeı aýdıo-nusqasynan turady. Saıtta ár ertegini onlaın tyńdaýǵa, júktep alýǵa nemese mobıldik qosymsha arqyly júkteýge arnalǵan batyrma bar.

«Aray Madia Group» stýdııasy ókil­deriniń aıtýynsha, mobıldi nusqa qańtar aıynan bastap iske qosylady. Sonda ınternetke kirip, ózińizge unaǵan ertegini júktep alýǵa bolady. Búginderi saıtqa óńdelgen 12 ertegi engizilgen - «Ur, toqpaq», «Úsh qý», «Altyn at», «Qarǵa ba­la­syn appaǵym der, kirpi balasyn jum­saǵym der», «Batyl esek», «Jarty tóstik», «Asan nege «Qaıǵy» atanǵan?», «Altyn balta», «Alpystan asqannan aqyl sura», «Arý aqqý men Baba túkti shashty Ázız». Jańa jylǵa deıin taǵy 24 ańyz-ertegi ornalastyrylady eken.

«Bul ertegilerdi kim oqyǵanyn bilesiz be? Olardyń arasynda dástúrli ánshiler Gúlmıra Sarına men Erlan Rysqalı, opera ánshisi Súndet Baıǵojın, ázil-syqaq teatrynyń artısi Tursynbek Qabatov, telejúrgizýshi Nurlan Qoıanbaev, «Balapan» telearna­synyń dırektory Láılá Sultanqyzy, estrada ánshileri Qaraqat Ábildına, Janar Aıjanova, Álı Oqapov, Almas Kishkenbaev, Janar Doǵalova, Ardaq Balajanova, aıtysker aqyn Balǵynbek Imashev, dırıjer Dınara Tilendıeva, sondaı-aq telearna arqyly tanymal bolǵan Aıgerim Esenáli men Maııa Veronskaıa bar», - delingen materıalda.

***

Depýtat Almas Turtaev, eki dúrkin Olımpıada chempıony, tórt dúrkin Álem chempıony Ilıa Ilın, ánshi Almas Kishkenbaev, aıtysker aqyn Erkin Sadyquly, jas ǵalym Ashat Myńbaı, álemdik sán sahnasyna qazaqy ónerdi damytýǵa qushtar jas dızaıner Aıa Bapanı kindik qany tamǵan jerge taǵzym etti, dep habarlaıdy « Túrkistan » basylymy "S yr boıynyń túlekteri kindik qany tamǵan jerde ... » atty taqyryppen jarııalanǵan maqalada.

«Qyzylorda qalasynda ótkizilgen «Týǵan jerge taǵzym» atty І Patrıottyq jastar forýmynyń basty maqsaty Syr boıynan túlep ushqan tanymal jastardyń basyn týǵan jerde qosyp, Qyzylorda óńiri men Qazaq elin damytýǵa birge atsalysýǵa úndeý bolatyn. Ultymyzdyń, jalpy halqymyzdyń ulyq merekesi - Táýelsizdik kúnine oraılastyrylǵan bul sharany uıymdastyrýǵa Qyzylorda oblysynyń ákimi Qyrymbek Kósherbaev muryndyq boldy. Patrıottyq forýmǵa qatysqandar tiziminde QR Parlamenti Májilisiniń depýtaty Almas Turtaev, eki dúrkin Olımpıada chempıony, tórt dúrkin Álem chempıony Ilıa Ilın, ánshi Almas Kishkenbaev, aıtysker aqyn Erkin Sadyquly, jas ǵalym Ashat Myńbaı, álemdik sán sahnasyna qazaqy ónerdi damytýǵa qushtar jas dızaıner Aıa Bapanı t.b. birge jýrnalıst retinde biz de qatystyq. Forýmnyń ashylý saltanaty «Jalyndy patrıot» flesh-mobymen bastaldy. Sodan keıin delegattar oblystaǵy jas kásipkerlerdiń kórmesine qatysty. Oblys ákiminiń qoldaýymen júzege asyrylyp jatqan «Aqnıet» baǵdarlamasynyń nátıjesinde talaı qandas eki qolǵa bir kúrek taýypty. Bul týraly Qyrymbek Eleýuly: «Ómirde óziniń ornyn alam dep, bolashaqqa talpynyp, orta jáne shaǵyn bızneste eldiń ıgiligine jumys isteımin degen, óziniń qoǵamdaǵy ornyn naqtylaý úshin alǵa umtylǵan adamdarǵa bir múmkindik kerek. Ásirese, aýyldyq jerde. Naryqtyq ekonomıkanyń kósemi Adam Smıt emes, qara qazaqtan qalǵan sóz: «Eńbek etseń erinbeı, toıady qarnyń tilenbeı». Jobanyń nátıjeli bolýyna ákimder jaýapty dep esepteımin. «Aqnıet» baǵdarlamasy óńirdiń áleýmettik-ekonomıkalyq jaqsarýyna oń yqpal etip, serpin beredi degen senim bar», - deıdi. «Áleýmettik kásipker», «Jańalyq», «Qolóner», «Qamqor», «Bastama» jáne «Igilik» degen alty baǵyt boıynsha júzege asyrylatyn «Aqnıet» baǵdarlamasynyń arqasynda júzdegen adam grant alyp, sharýalaryn dóńgeletip otyr. Máselen, forým barysynda uıymdastyrylǵan kórmede qaıtarymsyz grant alyp, temir pisirý kásibinen nápaqa tapqan, jıhaz jasap, ony jergilikti naryqqa shyǵarǵan aǵaıyn «Aqnıetke» alǵysyn aıtty. Sonymen qatar atalǵan kórmede jas ǵalymdardyń ınnovatsııalyq jobalary tanystyryldy. Babadan balaǵa mıras bolǵan ulttyq qundylyqtar, salt-dástúrler men qazaqy turmys-tirshilikke qatysty paıdaly keńester qazirgi urpaqtyń sanasynan birtindep óship barady. Bizge mektep oqýshylary usynǵan kir sabyn jasaýǵa qatysty joba qatty unady», - delinedi maqalada.

***

«Qomaqty somany qaıyrymdylyqqa jumsaǵan qańǵybas amerıkalyqqa jurt 74 myń AQSh dollaryn jınap berdi», - dep jazady "Ekspress K" basylymy "Bezdomnomý altrýıstý sobralı 74 tysıachı dollarov" atty maqalasynda.

Los-Andjelestik vıdeobloger Djosh Peler Lın úısizge 100 dollar berip, ol qarajatty qaıda jumsaıtynyn bilý úshin onyń artynan ańdıdy. Blogerdiń "Úısiz adam 100 dollardy qaıda jumsaıdy?" atty vıdeosynda er kisi aldymen dúkenge baryp, kóp azyq-túlik satyp alǵan. Keıin ony ózi sııaqty kúısiz júrgen jandarǵa taratyp beredi. Odan áserlengen bloger Peler Lın oǵan taǵy 100 dollar ustatady. Qańǵybas Tomas óz ómirbaıannyn aıtyp berdi. Ol aýrýǵa shaldyqqan ata-analaryn kútý úshin jumysty tastap ketken, keıin olar qaıtys bolǵanda úısiz qalypty. Peler Lın úısizdiń kúıin keshken Tomasqa kómek berý úshin Indie Go Go atty naýqan bastady. Odan túsken qarjy vıdeoblogerdiń bastapqyda jınamaq bolǵan somasynan jeti ese asyp ketken. Naýqannyń aıaqtalýyna áli 28 kún bar.