Joldy japqan Astana turǵyndaryna 27,6 myń teńge aıyppul salyndy
«8 maýsym kúni Polıtsııa departamentiniń Jedel basqarý ortalyǵyna elordadaǵy turǵyn úı keshenderiniń birinde turǵyndardyń joldy jaýyp tastaǵany týraly habarlama kelip tústi.
Anyqtalǵandaı, azamattar menshik ıeleri birlestigi (MIB) tóraǵasynyń jınalys hattamalaryn burmalaý áreketterine kelispeıtindikterin bildirip, joldy jaýyp tastaǵan.
Turǵyndar jol qozǵalysy erejesiniń talabyn óreskel buzyp, polıtsııa qyzmetkerleriniń buıryǵyn oryndamaı, jol qozǵalysyna qatysýshylardyń ómiri men densaýlyǵyna qaýip tóndirdi.
Saldarynan 9 quqyq buzýshy ishki ister organdaryna jetkizilip, olar QR Ákimshilik quqyq buzýshylyq týraly kodeksiniń 443-baby (qoǵamdyq tártipti qamtamasyz etýge qatysatyn adamnyń zańdy talabyna baǵynbaý) jáne 614-baby (kólik quraldarynyń júrýine kedergi keltirý) boıynsha ákimshilik jaýapkershilikke tartylyp, árqaısysyna 8 AEK (1 AEK – 3450 teńge) kóleminde ákimshilik aıyppul salyndy», - delingen habarlamada.
Astana qalasynyń prokýratýrasy zańdy buzý faktilerine jol bermeýdi, quqyq qorǵaý organdary qyzmetkerleriniń zańdy talaptaryn múltiksiz oryndaýdy eskertedi jáne bul talaptardy oryndamaǵan nemese zańsyz áreketter jasaǵany úshin ákimshilik jáne qylmystyq jaýapkershilik qarastyrylǵanyn eske saldy.