Joldaýdyń bilim berý salasy úshin mańyzy zor- mektep dırektory
«Búgingi qoǵamǵa mańyzy bar úlken otyrysta barlyq Aqmola oblysynyń ustazdary atynan sóz sóıleýge múmkindik bergenderińiz úshin rızashylyǵymdy bildiremin. Ustaz qashan da bolmasyn qoǵamdyq damýdyń deńgeıinen kórinetin, onyń áleýmettik paryzyna jaýap berýdi kózdeıtin, jańalyqqa jarshy maman ıesi. Sondyqtan da, Elbasymyzdyń kezekti Joldaýy - bilim berý salasy úshin mańyzdylyǵy zor Joldaýdyń biri boldy», deıdi Dana Ysqaqova.
Sonymen qatar, ol ózi basqaryp otyrǵan bilim ordasynda Joldaýda aıtylǵandaı, halyqarlyq standarttarǵa saı bilim berý qolǵa alynǵanyn atap ótti.
«Joldaýda «Bilim sapasyn baǵalaý júıesi halyqaralyq standarttarǵa negizdelýge tıis»,- delingen. Sonymen qatar, bilim berý isinde oqytýdyń jańa ádis-tásilderin engizýge basa nazar aýdarylýda. Osyǵan oraı, ózim jumys jasaıtyn daryndy balalarǵa arnalǵan №3 oblystyq mamandandyrylǵan mektep-ınternatynyń oqý ádistemesine Kembrıdj baǵdarlamasy boıynsha Nazarbaev mektepteriniń tájirıbesi engizildi.Barlyq synyptar jańartylǵan bilim berý mazmunyna satylap kóshirilýde. Jaratylystaný-matematıka pánderiniń úsh tilde oqytylýy júzege asyrylýda. Osy jumystardyń nátıjesinde ótken oqý jylynda 5 oqýshymyz respýblıkalyq, 2 oqýshymyz halyqaralyq bilim baıqaýlarynyń jeńimpazdary bolǵandyǵyn maqtanyshpen aıta alamyn», - dep sózin túıindedi Dana Ysqaqova.
Sonymen qatar, ol basqa da bilim uıymdary sııaqty ózi basqaryp otyrǵa mekteptiń Joldaýda aıtylǵandaı, balalar qaýipsizdiginiń mańyzdylyǵy eskerilip, 54 beınebaqylaý júıesimen qamtamasyz etilgenin atap ótti.
Aıta keteıik, bilim salasynda 2018 jylǵy basymdyqqa ıe bolǵan jobalardyń biri - «Tegin ІT synyptaryn ashý». Bul maqsatta Aqmola oblysy mektepterinde 61 tegin ІT synyptary ashyldy. Sonymen qatar, jańa oqý jylynda oblys ortalyǵy Kókshetaý qalasynda tuńǵysh ret 900 oqýshyǵa arnalǵan qazaq tilindegi ІT mektep-lıtseıi ashyldy. Barlyq zamanaýı tehnologııalarmen jabdyqtalǵan mektep-lıtseıinde oqýshylarǵa ІT salasynda tereńdetilgen bilim berýge tolyq múmkindik bar. Oqýshylardyń boıynda otansúıgishtikti, ultjandylyqty, patrıotızmdi qalyptastyratyn «Jas ulan», «Jas qyran» atty klýbtar jumys isteıdi. Aldaǵy turǵan mindetterdiń biri - «Sarbaz» birlestikterin quryp, áskerı-patrıottyq tárbıeniń rólin kúsheıtý. Bıylǵy jyly «Rýhanı jańǵyrý» baǵdarlamasy aıasynda alǵash ret oblystyń 70 oqýshysy Qyzylorda oblysynyń kıeli jerlerimen tanysý maqsatynda saıahatqa baryp qaıtty. Bul bastama - mektep týrızmin damytýdyń alǵashqy qadamy bolyp otyrǵan jaıy bar.