Joldaýdaǵy tapsyrmalar bıýdjet arqyly oryndalýy tıis - depýtat

ASTANA. QazAqparat - Memleket basshysy Nursultan Nazarbaevtyń Qazaqstan halqyna Joldaýynda aıqyndalǵan barlyq tapsyrmalar bıýdjet arqyly oryndalýy tıis. Bul týraly Joldaýdyń negizgi baǵyttary talqylanǵan Astanadaǵy qalalyq №10 aýrýhananda QR Parlament Májilisiniń depýtaty Muhtar Erman atap ótti, dep habarlaıdy QazAqparat tilshisi.

«Elbasy óz Joldaýynda medıtsına salasyna erekshe nazar aýdaryp otyr. Dárigerler úshin ózektisi - álbette jalaqy máselesi. Ózderińiz biletindeı, Memleket basshysy óz Joldaýynda dárigerlerdiń jalaqysy 2019 jyldan bastap 20 paıyzǵa ósetinin aıtty. Búginge deıin bıýdjettiń eki jobasy Májiliste qaraldy. Bireýinde qazirgi aǵymdaǵy bıýdjetti naqtyladyq. Másele ret-retimen sheshilip kele jatyr. Biraq, dárigerge búkil qoǵam kómektesýi kerek. Mysaly, mektepte otyrǵan balaǵa partasy yńǵaısyz bolsa, ol skolıozben aq halattylarǵa keledi. Eger synyptyń jaryǵy durys bolmasa, ol bala kóz dárigerine keledi. Sondyqtan, dárigerlerdiń qoǵam aldyndaǵy jaýapkershiligi joǵary», - deıdi Muhtar Erman.  

Depýtat óz sózinde bes jyl boıy pedıatrııa máselesinde kemshilik bolǵanyn eske aldy. 

«Biraq, byltyrdan beri barlyq medıtsınalyq ýnıversıtetterdiń oqý baǵdarlamasyna pedıator mamandyǵyn qaıta qalpyna keltirdik. Jumys osylaı rettelip keledi. Endi taǵy bir másele - zamanaýı tehnologııalardy meńgergen jastardyń bolýy. Biraq, qazirgi jastardyń bilimi men múmkindigin baǵamdaı kele atalmysh salada eshqandaı máseleniń týyndamaıtynyna senim bildirýge bolady», - deıdi ol. 

Eske sala ketsek, Memleket basshysy Nursultan Nazarbaev halyqqa Joldaýynda medıtsına qyzmetkerleriniń jalaqysyn kóterýdi tapsyrǵan bolatyn.