Joldaýdaǵy reformalardyń mazmuny tarıhı turǵyda mańyzdy – Qorǵanys mınıstri
«Prezıdent Qasym-Jomart Toqaevtyń Parlament palatalarynyń birlesken otyrysynda sóılegen sózi saıası jáne ekonomıkalyq ózgeristerdiń dáıekti ári batyl júrgizilip jatqanyn aıǵaqtaıdy. Memleket basshysy naqty tapsyrmalary arqyly Qazaqstannyń saıası aýysýlar júıesin kezeń-kezeńmen qalyptastyrdy. Onyń ishinde, áskerlerdiń jaýyngerlik ázirligi men qabiletin arttyrýǵa, áskerı qyzmettiń bedelin kóterýge jáne jeke quramnyń jaýyngerlik rýhyn qoldaýǵa baǵyttalǵan Qarýly kúshterdi jańǵyrtý iske asyrylýda. Aıtylǵan reformalardyń mazmuny jáne ákimshilik-aýmaqtyq jańalyqtar shyn máninde tarıhı turǵyda mańyzdy. Bul rette Joldaý azamattardy jańa Qazaqstandy qurýǵa tartý úshin kóp múmkindikter beretinin aıryqsha atap ótýge bolady», - dedi R. Jaqsylyqov.
Onyń paıymynsha, saılaý zańnamasyndaǵy, parlamenttik jáne partııalyq qurylystaǵy, jergilikti ózin-ózi basqarýdy damytýdaǵy, Prezıdent pen ákimderdi saıası partııalardyń qyzmetinen alshaqtatýdaǵy ózgeristerdi atap ótýdiń ózi jetkilikti. Halyqaralyq normalarǵa sáıkes, azamattardyń quqyqtaryn saqtaý jónindegi jumys kúsheıtilip, Konstıtýtsııalyq sot qaıta qurylatyn boldy.
«Prezıdenttiń Qazaqstan halqyna Joldaýynda aıtylǵan saıası ınnovatsııalar, bir jaǵynan, demokratııalyq bastaýlardy nyǵaıtsa, ekinshi jaǵynan, memlekettiń turaqtylyǵyn arttyrýǵa jumys isteıdi. Bul turǵyda búginde Qarýly kúshterde de reformalaý protsesi júrgizilýde. Gıbrıdti qaýipter kóbeıip jatqan ýaqytta uıymdyq, tehnıkalyq jáne tehnologııalyq deńgeıler ózgerýde. Áskerlerdiń jaýyngerlik daıarlyq josparlaryna túzetýler engiziledi. Bul rette standartty emes mindetterdi oryndaýǵa, sheshimderdi jedel qabyldaýǵa jáne vedomstvoaralyq úılestirýge erekshe nazar aýdarylatyn bolady. Prezıdenttiń Jarlyǵy boıynsha Qorǵanys mınıstrligine qaraıtyn Arnaıy operatsııalar kúshteriniń qolbasshylyǵy quryldy. Olarǵa asa kúrdeli mindetterdi oryndaý, sonyń ishinde terrorızmge qarsy operatsııalarǵa qatysý jáne zańsyz qarýly quralymdarǵa qarsy is-qımyl júrgizý júktelgen», - dedi Qorǵanys mınıstri.
Onyń sózine qaraǵanda, áskerlerdi aqparattandyrý jáne robottandyrý deńgeıin arttyryp, memlekettik organdarmen ıntegratsııalanǵan áskerlerdi basqarýdyń avtomattandyrylǵan júıelerin damytýǵa qatysty jumys atqarylady.
«Prezıdent jarııalaǵan reformalardyń nátıjeli bolýy qoǵamnyń birligi men tutastyǵyna baılanysty ekeni sózsiz. Áskerge arnalǵan jobada bizdiń kúshimiz – kásibı bilikte, jaýyngerlik mashyq pen qatań tártipte dep aıtar edim. Mine, osyndaı jaǵdaıda ǵana qasıetti Otanymyzdyń negizi berik, al memleketimiz – bedeldi bolary anyq. Memleket basshysynyń bul mańyzdy Joldaýyn ár qazaqstandyq jaqyn qabyldady dep oılaımyn», - dedi Rýslan Jaqsylyqov.