Joldaýdaǵy bastamalar kópbalaly otbasylar men jastardy baspanamen qamtýǵa múmkindik beredi – Beısen Tájibaev

TÚRKІSTAN. QazAqparat – El Prezıdenti Qasym-Jomart Toqaev óziniń Joldaýynda «Nur Otan» partııasynyń ózge de saıası partııalarmen seriktese otyryp jumys isteý qajettigin aıtty. Memleket basshysy osy tusta jetekshi partııanyń naǵyz qoǵamshyl, naǵyz halyqshyl partııaǵa aınalýy tıis ekenin atap ótti. Bul bastamany partııa músheleri de biraýyzdan qoldap otyr, dep habarlaıdy QazAqparat tilshisi.

Túrkistan oblystyq «Nur Otan» partııasy fılaly tóraǵasynyń birinshi orynbasary Beısen Tájibaevtyń pikirinshe, búgingi nurotandyqtar osy sózdiń túp-tórkinin tereń uǵynyp, qoǵamdaǵy ózekti máselelerdi der kezinde sheshýge barynsha atsalysýy tıis.

«Ol úshin barlyq múmkindikterdi tıimdi paıdalanyp, ózge de saıası partııalar men qoǵamdyq qozǵalystarmen bite qaınasyp, birlese áreket etse, utymdy bolary anyq. Halyqtyń senimin aqtaýdan basqa uly murat joq. El túrli qıyndyqtar men kedergilerge ushyraǵanda «Nur Otanǵa» úmit artyp, kómek surap keledi. Ótken 8 aıdyń ózinde bizdiń oblystyq Qoǵamdyq qabyldaýǵa 5204 aryz-shaǵym túsken. Munda kóterilgen máseleniń basym bóligi sheshimin taýyp, tıisti kómekter kórsetildi. Degenmen qordalanǵan máseleler jetkilikti. Ony bárimiz kelisim stolynda keńese otyryp sheshkenimiz durys. Halyqpen baılanys jańasha formatta jandanýy tıis», - deıdi Beısen Tájibaev.

Oblystyq «Nur Otan» partııasy fılıaly tóraǵasynyń birinshi orynbasary sondaı-aq, partııa ókilderiniń sońǵy jyldary túıindi túıtkildi máselelerdi minbelerde emes, kóshelerde talqylanyp júrgenin aıtady. ıAǵnı elimizde azamattyq qoǵammen dıalog áli durys ornyǵa alǵan joq.

«Bılik pen halyqtyń arasynda qoǵamdyq dıalog durys ornyqpasa, elimizdegi tatýlyq pen turaqtylyq týraly sóz qozǵaý beker bolady. Sondyqtan árbir memlekettik qyzmetker osy baılanystyń durys ornyǵýyna ózindik úlesin qosýy tıis. Árbir memleketshil azamat halyqtyń muń-muqtajyn tyńdaýdan qashpaý kerek. Bılikke túıindi túıtkildi der kezinde kóre biletin, onyń sheshilý jolyn taba biletin azamattar qajet. Sonda ǵana kez kelgen túıtkildiń túıinin tarqatýǵa bolady. Osy rette Qasym-Jomart Kemeluly «Elbasymyzdyń «El birligi – eń basty qasıet» degen qanatty sózi bizdiń aınymas qaǵıdamyz. Bereke men birlik, aqyl men parasat halqymyzdy únemi alǵa bastap keledi. Baǵytymyz – aıqyn, jolymyz – ashyq, barlyǵymyz birge bolsaq elimiz budan da zor tabysqa jetedi dep senemin», - dedi.

Joldaýda kóterilgen taǵy bir mańyzdy máseleniń biri – baspana máselesi. «2020 jyldan bastap jyl saıyn 10 myń otbasy «Baqytty otbasy» baǵdarlamasy arqyly baspanaly bolady», - dedi Prezıdent. Bul máselege oraı Beısen Tájibaev atalǵan baǵdarlamanyń tıimdiligi mol ekenin alǵa tartady.

«ıAǵnı, jeńildik mólsherlemesi nebári 2 paıyzdy, alǵashqy jarnasy 10 paıyzdy quraıdy. Eger biz osy baǵdarlamany tolyq iske asyra alsaq, qanshama kópbalaly otbasy men múgedek bala asyrýshy januıalardy, jastardy baspanamen qamtyǵan bolar edik. Eldiń damýyn árbir otbasy sezingende ǵana berekeli qoǵam ornaıdy. Al baspanaly bolý sonyń basty sharty. Bul baǵytta sońǵy jyldary nátıjeli jobalar júzege asýda. Túrkistan qalasynyń ózinde ótken aptada 700-deı áleýmettik jaǵynan az qamtylǵan otbasy baspanaǵa qol jetkizdi. Bul jumystar eseleneri anyq»,- deıdi fılıal tóraǵasynyń orynbasary.