Joldaýda kóterilgen bastamalar ózekti máselelerdi sheshýge baǵyttalǵan - Aısulý Ernııazova

ALMATY. QazAqparat - «Qazaqstannyń volonterler lıgasy» qoǵamdyq qorynyń tóraıymy Aısulý Ernııazova Memleket basshysynyń búgingi halyqqa Joldaǵan «Halyq birligi jáne júıeli reformalar – el órkendeýiniń berik negizi» atty Joldaýyna qatysty pikir bildirdi, dep habarlaıdy QazAqparat tilshisi.

Aısulý Ernııazova Memleket basshysynyń Joldaýynyń keıbir tustaryna toqtaldy.

«Qoǵamdaǵy mańyzdy salalardyń biri- medıtsına. Búgin Prezıdent medıtsınalyq jabdyqtardyń 17% ǵana Qazaqstanda jasalatynyn aıtyp, 2025 jylǵa qaraı onyń úlesin 50%-ǵa jetkizý týraly tapsyrma berdi. Bul úlken qadam.

Pedagogterdiń bilimine 1,2 trln teńge bóletin boldy. Qazaqstan muǵalimderdi qoldaý saıasatyn jalǵastyrýda. Bári bilimge kelip tireledi, erteńgi bolashaq urpaǵymyzdyń bilimdi bolǵany bárimizge kerek. Sondyqtan muǵalimderdi qoldaý asa qajet dep oılaımyn.

Memleket basshysy halyq ákimniń jumysyn qalaı baǵalaıtynyn bilý úshin táýelsiz áleýmettik saýalnamalar tetikterin kúsheıtý kerektigin tilge tıek etti. Bul progresske degen yntamyzdy jedeldetedi»,- dedi Aısulý Ernııazova.

Onyń pikirinshe, Joldaýda kóterilgen bastamalar ózekti máselelerdi sheshýge baǵyttalǵan.

«Áıelder men jastar úshin bólinetin kvotalardan bólek, erekshe muqtajdyǵy bar adamdarǵa kvota bólinetin boldy. Damyǵan qoǵamda barshanyń quqyǵy birdeı eskerilýi tıis. Sondyqtan bul da bizdiń qoǵam úshin úlken qadam bolyp otyr.

Prezıdentimizge rahmet, osyndaı baǵyt siltep bergeni úshin. Men árbir memlekettik qyzmetkerge, depýtat, dáriger, pedagog, volonter, árbir qyzmetker men Qazaqstan azamatynyń atqaratyn isine sáttilik tileımin»,- dep qortyndylady ol.