Joldaýda qoǵam talaby eskerilgen - Prezıdenttik jastar kadr rezerviniń múshesi

NUR-SULTAN. QazAqparat – Prezıdenttik jastar kadr rezerviniń múshesi Erbol Tólegenov Memleket basshysynyń Joldaýynda aıtylǵan saıası reformalar men júktelgen mindetterge qatysty pikir bildirdi, dep habarlaıdy QazAqparat tilshisi.

«Prezıdenttiń bul jolǵy Joldaýy saıası reformalarǵa arnalǵan. Menińshe, alǵa qoıylǵan mindet anyq, endi sony júzege asyrý kerek. Osy tusta aıtyp ótetin bir jaıt, joldaýda másele naqty aıtylady, al is júzinde sonyń shamamen 30 paıyzy oryndalady. Sondyqtan osy Joldaýdyń júzege asý deńgeıi joǵary bolady dep úmittenemin. Meniń ortamdaǵy jandardyń deni Prezıdent bastamalaryn qoldaıdy. Qoǵam talabyn qoısa, Prezıdent oǵan jaýap berip otyr. ıAǵnı jańa Joldaýda qoǵam talaby eskerilgen. Árıne, adamdardyń talaby men ótinishi kún saıyn ósip jatyr, onyń oryndalý reti bolý kerek», - dedi Erbol Tólegenov.

Sondaı-aq, jas maman Konstıtýtsııaǵa engiziletin ózgerister men Konstıtýtsııalyq sot qurýǵa qatysty oıyn ortaǵa saldy.

«Joldaýdan túrtip alǵan taǵy bir sát, sýperprezıdenttik memleketten myqty Parlament jáne jaýap beretin Úkimeti bar elge kóshetinimiz. Odan bólek, elimizde Konstıtýtsııalyq sottyń qurylatyny oń sheshim. Demokratııalyq qoǵamda konstıtýtsııalyq sottyń bolýy qalypty jaǵdaı. Konstıtýtsııaǵa engizý kerek ózgeristi de qoǵamnyń talqysyna salǵan jón», - deıdi ol.