Joldaýda halyqtyń ál-aýqatyn jaqsartýǵa basymdyq berilgen - Qyrǵyz sarapshysy

BІShKEK. QazAqparat - Qazaqstan Respýblıkasynyń Prezıdenti Nursultan Nazarbaevtyń Joldaýynda adam men onyń qundylyǵy máselesi alǵa qoıylyp, óskeleń urpaqqa aktsent jasalǵan.  Qyrǵyzstannyń tanymal saıası jáne qoǵam qaıratkeri Toqtaıym Úmetálıeva osyndaı pikir bildirdi, dep habarlaıdy «QazAqparat» tilshisi.

«Densaýlyq, bilim, mádenıet jáne sportqa, óskeleń urpaqqa kóńil bólmeıtin memlekettiń bolashaǵy joq. Sondyqtan Nursultan Nazarbaevtyń óz Joldaýynda adam, otbasylyq qundylyqtar, ár azamattyń ál-aýqatyn jaqsartýǵa erekshe den qoıǵany óte mańyzdy. Áleýmettik sektor kóterilmeı, el ekonomıkasyn damytý múmkin emes», - dep sanaıdy T.Úmetálıeva.

Sarapshynyń pikirinshe, Qazaqstan Prezıdentiniń Joldaýy - bul úlken eńbek. Onda birneshe mańyzdy strategııalyq máselelerdi belgilep ótýge bolady.  

«Qujatta turǵyn úı-kommýnaldyq sharýashylyqqa, turǵyndardyń ómirin jaqsartýǵa kóp kóńil bólingen. «7-20-25» ıpotekalyq baǵdarlamasy unady. Aımaqtardy damytý, ásirese turǵyndardy medıtsınalyq jaǵynan qoldaýdy damytýǵa kóńil bólingeni mańyzdy. Aýyl sharýashylyǵy men jergilikti óndirýshilerdi qoldaý sharalary týraly qyzyǵyp oqydym. Bul óte mańyzdy dep sanaımyn, sebebi Qazaqstan zor áleýeti bola turyp, aýylsharýashylyq múmkindikterin tolyq kólemde paıdalanyp otyrǵan joq. Jaǵdaı ózgerse, tamasha bolar edi. Nursultan Nazarbaev óz Joldaýynda áleýmettik sektordy naqty bólip ótip, óskeleń urpaqqa ózgeshe mán berdi. Budan basqa, taǵy bir sátti atap óteıin, ol - jańa tehnologııalarǵa kóńil bólý. Búkil Ortalyq Azııa úshin Qazaqstan ınnovatsııalyq tehnologııalardy engizý jáne qurylysty keńeıtýdiń lokomotıvi bolyp qalyp otyr. Ótken jyly men EHRO halyqaralyq kórmesine bardym, Astananyń fýtýrıstik ǵımarattaryn kórip, basqa álemde bolǵandaı áserge bólendi. Áli erekshe sezimde júrmin», - dep bólisti pikirimen sarapshy.

Eske sala keteıik, 5 qazan kúni Nursultan Nazarbaev Qazaqstan halqyna Joldaýyn jarııa etken bolatyn.