Joldaýda eldiń áleýmettik-ekonomıkalyq ahýalyna tereń taldaý jasalǵan – Assambleıa múshesi

KÓKShETAÝ. QazAqparat - Qazaqstan halqy Aqmola Assambleıasynyń múshesi, oblystyq ardagerler keńesiniń tóraǵasy Ǵosman Tóleǵul Prezıdenttiń keshegi Joldaýyna qatysty pikir bildirdi, dep habarlaıdy QazAqparat.

Spıkerdiń aıtýynsha, Prezıdent dástúrli túrde elimizdiń ótken kezeńdegi áleýmettik-ekonomıkalyq ahýalyna tereń taldaý jasap, qol jetken tabystarymyzǵa obektıvti baǵa berdi hám alda turǵan belesterdi aıqyndady. Jáne munyń bárin álemde búgin qalyptasyp otyrǵan kúrdeli jaǵdaımen, jahandy jaılaǵan pandemııanyń zalalymen baılanystyra otyryp, budan shyǵýdyń neǵurlym ońtaıly joldaryn saralaı kórsetti.

«Etnosaralyq qatynastar mádenıetin odan ári damyta, nyǵaıta berý – bizdiń saıasatymyzdyń basty qyrlarynyń biri deı kele, Prezıdent osy úrdisti kózimizdiń qarashyǵyndaı saqtaýymyz kerek ekendigine salmaq sala aıtty. Shynynda da, bul búgin tańda kún tártibinen esh túsirýge bolmaıtyn másele. Biraq osynaý úrdistiń ózegine aınalýǵa tıis dúnıe – ol memlekettik tildi tıisti dárejesine kóterý isin esh tómendetpeý ekeni belgili. Qazaq tilinde sóıleý – otanshyldyqtyń basty belgisi, dedi Memleket basshysy. Bul turǵyda Qazaqstan halqy Assambleıasynyń aldynda turǵan mindetter de orasan zor jáne atalmysh ınstıtýt sol mindetterdi júzege asyrýda áli de talaı jumystar atqarýǵa tıis ekendigi oryndy aıtyldy», - dedi Ǵosman Tóleǵul.

Qazaqstan – áleýmettik memleket. Sol sebepti de el damýynyń barlyq saıası-ekonomıkalyq baǵyttarynyń túpki maqsaty halyqtyń áleýmettik ahýalyn barynsha jaqsarta berý. Osy oraıda Prezıdentimiz Qasym-Jomart Kemelulynyń aldaǵy jyldyń birinshi qańtarynan bastap eń tómengi jalaqynyń kólemi 60 myń teńgege jetedi, jalpy az jalaqy alatyn mamandyqtar ıeleriniń aılyq tabysy óse túsedi degen málimdemesi kórermender tarapynan zor qanaǵattanǵandyq sezimmen qabyldanǵany haq. Mundaı derekter Prezıdenttiń baıandamasynda az bolǵan joq.

«Árıne, keıin ekonomıst-sarapshylar, saıasatkerler, qoǵamtanýshylar Joldaý boıynsha óz pikirlerimen bólise jatar, ǵylymı paıymdarymen onyń ár qyryn tereńdete túser, halyq sanasyna sińirýge barynsha atsalysar. Bul ózi solaı bolýǵa tıis sharýa ǵoı. Jalpy aıtqanda Prezıdent Joldaýy halyqty kýantqan mańyzdy qujat boldy», - qorytyndylady spıker.

Eske salsaq, 1 qyrkúıek kúni QR Prezıdenti «Halyq birligi jáne júıeli reformalar – el órkendeýiniń berik negizi» atty halyqqa Joldaýyn jarııalady. Joldaýdyń tolyq mátini myna jerde.