Joldaýda atalǵan máselelerdiń nátıjeli oryndalýyn asyǵa kútemiz - Amanjol Áltaı

ALMATY. QazAqparat - Aıtys aqyny, Qazaqstannyń eńbek sińirgen qaıratkeri Amanjol Áltaı Prezıdent Qasym-Jomart Toqaevtyń bıylǵy Joldaýyna qatysty pikir bildirdi, dep habarlaıdy QazAqparat tilshisi.

Aqynnyń aıtýynsha, Prezıdenttiń bıylǵy Joldaýy halyqty tolǵandyrǵan biraz mańyzdy máselelerdiń sheshilýine jol ashty, Úkimet pen tıisti memlekettik organdarǵa naqty tapsyrmalar berdi.

«Ózim óner adamy bolǵandyqtan da mádenıet salasyndaǵy kitaphanashy, mýzeı qyzmetkeri sekildi mamandardyń jalaqysy 2025 jylǵa deıin jyl saıyn 20 paıyzǵa kóteriletindigin jyly qabyldadym. Sapaly bilim berý, ǵylymdy damytý, sol arqyly ozyq tehnologııany ıgerý - eń negizgi memlekettik strategııalyq maqsatymyz bolýǵa tıis. Ult bolashaǵy - tárbıeli, bilimdi urpaq»,- dedi ol. Aqyn Joldaýda aıtylǵan bilim berý salasyn damytý máselesine qatysty óz oıyn bylaı jetkizdi: «Prezıdenttiń 2022 - 2025 jyldar aralyǵynda myń mektep salýdy tapsyrýy da urpaq bolashaǵyna jasalǵan qamqorlyq. Aýyldyq jerlerde mektepter men qosa mádenıet oshaqtaryn, sport zaldaryn salý máselesin de ókimet pen jergilikti bılik keshendi qolǵa alsa aýyl jastarynyń qanattanýyna jol ashar edik. Prezıdent Joldaýynda halyqaralyq olımpıada júldegerleri bolǵan oqýshylardy materıaldyq, rýhanı yntalandyrýdy, ǵylym salasyn qarjylandyrý merzimin bes jylǵa uzartýdy usyndy. Bul da daryndy balalarǵa, ǵalymdarǵa serpin beretin ıgilikti bastama», - dedi ol. Aýyldy órkendetý - ulttyń mereıin kóterý, dep sanaıdy Amanjol Áltaı. «Bul turǵyda da Joldaýda biraz máseleniń sheshilýine tapsyrma berdi. Atap aıtqanda: jem - shóp daıyndaıtyn jerlerdi keńeıtý, aýyl mańynda jaıylym jerlerdiń joqtyǵy, aýyl - sharýashylyq tehnıkasyn jańartý, ǵaryshtyq morıtorıng jáne zondtaý múmkindigin qoldaný, sýbsıdııa máselesin jetildirý, mal dárigeri mamandarynyń jalaqysy men statýsyn kóterý sekildi máselelerdi qadap aıtty. Endigi jerde úkimettiń tııanaqty oryndaýyn tileımiz», - dedi Amanjol Áltaı. «Dúrbeleńge toly, álem alasapyran kúıge túsken, pandemııa alqymnan alǵan búgingideı kúrdeli kezeńde sabyrǵa shaqyrý, tatýlyqqa, parasattylyqqa, memleketshildik pen otansúıgishtikke, eńbekqorlyq pen bilimdilikke, otbasy qundylyǵyn saqtaýǵa úndeýde ulttyń ıntelektýaldyq kórsetkishi bolyp tabylatyn zııaly qaýym ókilderiniń mindeti men paryzy úlken ekendigine Prezıdent Joldaýda toqtalyp ótti. Bul turǵyda Memlekettik hatshy Qyrymbek Kósherbaev Prezıdent Joldaýy týraly «Egemen Qazaqstan» basylymynda jarııalaǵan «Zııaly júgi - zil batpan» maqalasynda jan - jaqty, tereń ashyp jazǵan bolatyn. Zııaly qaýym ókilderi qoǵamnyń barometri sekildi bolyp, aqyl keńesin, óz ıdeıasyn aıtyp otyrýy tıis. Prezıdenttiń Joldaýda atap kórsetken naqty tapsyrmalardy, qozǵalǵan máselelerdiń nátıjeli oryndalýyn asyǵa kútemiz», dep qorytyndylady Amanjol Áltaı.