Joldaý júzege asýda: Qaraǵandy oblysy qoı etin eksporttaı bastady

ASTANA. QazAqparat - Qytaı naryǵyna Qaraǵandy oblysynan qoı eti eksporttala bastady. Bul týraly búgin Astanadaǵy Ortalyq kommýnıkatsııalar ortalyǵynda ótken baspasóz máslıhatynda aımaq basshysy Erlan Qoshanov málim etti, dep habarlaıdy QazAqparat tilshisi.

«Et sharýashylyǵynyń máseleleri, ásirese, bizdiń óńir úshin óte mańyzdy suraq. Birinshiden, oblysta jyl sońyna deıin 1 myń tonna etti eksporttaý josparlap otyrmyz. Qazir 800 tonnaǵa jýyǵyn eksportqa shyǵaryp qoıdyq. Negizgi maqsatymyz - qoı sharýashylyǵyn ary qaraı damytý. Shyny kerek, qazir qoı sharýashylyǵy tómendep, usaq maldyń sany da azaıyp barady. Biraq, bizdiń Saryarqa dál sol qoı sharýashylyǵyn óristetýge yńǵaıly meken. Bul rette, eki másele baryn aıta keteıin. Birinshisi - ishki naryqtaǵy suranys. Ekinshiden, qazirgi jaıylymdardyń ınfraqurylymy men sýlandyrý júıeleri bolmaı tur», - deıdi Erlan Qoshanov. 

Aımaq basshysynyń aıtýyna qaraǵanda, osy másele Elbasynyń tikeleı kómegi arqyly sheshilip otyr.

«Búgingi kúni Elbasynyń kelisýimen qoı etin Qytaı naryǵyna eksporttaý múmkindigine jol ashylyp otyr. Alǵashqy partııany eksporttadyq. Jyldyń aıaǵyna deıin qytaılyqtar áli 40 myń qoı surap otyr. Árıne, bul bizdiń óńir úshin úlken múmkindik. Ekinshiden, jaıylymdardy sýlandyrýǵa qatysty Memleket basshysynyń tikeleı tapsyrmasy bar. Ol jóninde jumystardy bastadyq: 300 myń gektarǵa deıingi jaıylymnyń ınfraqurylymdaryn rettep, sýlandyryp kele jatyrmyz. Ol úshin 1,7 mlrd teńge sýbsıdııa bólindi. Sonymen qatar, 21 qudyq qazylyp, 500-deı kún sáýlesiniń panelderi arqyly qudyqtar jumys isteýde», - deıdi oblys ákimi.