Joldaý saıası reformalardyń jańa baǵytyna jol ashty - depýtat

TALDYQORǴAN. QazAqparat - Memleket basshysynyń Qazaqstan halqyna arnaǵan Joldaýy el ishinde saıası reformalardyń jańa baǵytyna jol ashty. Almaty oblystyq máslıhat depýtaty Dosan Karımov osyndaı pikir bildirdi, dep habarlaıdy QazAqparat tilshisi.

Saıası reformalar el ishinde tek saıası baǵyttaǵy jumystarǵa emes, áleýmettik-ekonomıkalyq damýǵa óz serpinin beredi. Prezıdenttiń Joldaýdaǵy bastamalary ol bir kúnde ázirlengen jumys emes, barlyq taldaý saraptaýlardan ótip, qoǵam talabyna saı jasalyp otyr jáne aldaǵy ýaqytta óz nátıjesin berýi tıis«,- deıdi Dosan Karımov.

Onyń pikirinshe, Joldaýda erekshe toqtalyp otyratyn negizgi erekshelik – jergilikti ózin-ózi basqarý ınstıtýtynyń kúsheıtilýi, depýtattardyń jumysyna tıisti baǵyt-baǵdar berý. Depýtattar saılaýaldy baǵdarlamalardy oryndamaǵan jaǵdaıda depýtattyq mandattan shyǵarý týraly Joldaýda kóterilgen bastama óte oryndy, sebebi depýtat bolý abyroı emes, el qamy úshin atqarylatyn jumys. Jalyndy sózderden góri naqty ispen kórsetetin zamanda biz halyq únine qulaq asyp, máselelerin tıisti organǵa jetkizip, onyń sheshilý kezeńine deıin jumys isteýimiz óte mańyzdy jáne osy arqyly jumysymyzdyń nátıjesin kóre alamyz.

« Qorytyndylaı kelsem, Joldaýdaǵy bastamalar Jańa Qazaqstandy qurý jolyndaǵy batyl sheshim dep aıtýǵa tolyq negiz bar jáne «bárimiz birimiz úshin-birimiz bárimiz úshin» degen qaǵıdatpen bul ıgi jumystardy birge iske asyrýǵa shaqyramyn»,- deıdi ol.