Joldaý mindetteri: Ortalyq-Ońtústik dálizin qaıta jóndeý 2022 jylǵa qaraı aıaqtalady

ASTANA. QazAqparat - Ortalyq-Ońtústik dálizin qaıta jóndeý jumystary 2022 jylǵa qaraı aıaqtalady. Bul týraly QR Investıtsııalar jáne damý birinshi vıtse-mınıstri Roman Sklıar málim etti, dep habarlaıdy QazAqparat tilshisi.

«Ortalyq-Ońtústik, Ortalyq-Shyǵys jáne Ortalyq-Batys dálizderin jóndeý sáýlelik prıntsıp boıynsha júzege asyrylýda. Ortalyq-Ońtústik dálizin qaıta jóndeýi týraly aıtar bolsam, 1291 shaqyrymdyq joldyń qurylysy 2013 jyly bastalyp ketken bolatyn. Dáliz tolyǵymen alǵashqy tehnıkalyq kategorııaǵa ótedi. 2013-2017 jyldar aralyǵynda Astana-Temirtaý (171 shaqyrym) jáne Almaty-Qapshaǵaı (104 shaqyrym) ýchaskelerinde qozǵalys ashyldy. Osy jyly Temirtaý-Qaraǵandy (14 shaqyrym), Karaǵandyny aınalyp ótý (47 shaqyrym) jáne Kúrti-Býrylbaıtal (228 shaqyrym) ýchaskesi ashylady. Sonymen qatar, osy aıda Balqash - Býrylbaıtal jolyn rekonstrýktsııalaý boıynsha kelisim bekitý kózdelgen. 2019 jyldan bastap Qaraǵandy - Balqash (363 shaqyrym) jáne Kúrti - Qapshaǵaı (67 shaqyrym) ýchaskelerin qaıta jóndeý bastalady. Jalpy, jobany aıaqtaý 2022 jylǵa josparlanyp otyr», - deıdi Roman Sklıar.

Vıtse-mınıstrdiń aıtýynsha, uzyndyǵy 905 shaqyrym bolatyn Ortalyq-Shyǵys dálizi boıynsha búgingi tańda Astana-Pavlodar (200 shaqyrym) jáne Pavlodar-Semeı-Qalbataý (204 shaqyrym) ýchaskelerinde qozǵalys ashylyp qoıǵan. Osy jyly 500 shaqyrymda jumystar júrgizilýde. Onyń 239 shaqyrymy bıyl aıaqtalsa, qalǵany 2019 jyly qoldanysqa beriletin bolady. Sonymen birge, atalǵan dálizde Astanadan Pavlodarǵa deıin jańa jabyn boıynsha joldy ashý kózdelgen. 2016 jyly Ertis ústimen salynǵan kópir paıdalanýǵa berildi. Ol qazirgi ýaqytta Ortalyq Azııadaǵy eń úlken kópir bolyp otyr.

Ortalyq-Batys dálizi bolsa, Astana - Arqalyq - Torǵaı - Yrǵyz - Qandyaǵash, Aqtóbe - Atyraý - Astrahan jáne Atyraý - Beıneý - Aqtaý baǵdarlaryn qosady. Qazirgi tańda Atyraý - Beıneý - Aqtaý baǵdary (798 shaqyrym) tolyǵymen qaıta jóndelgen. Qandyaǵash - Maqat (299 shaqyrym) baǵytynda qurylys-montajdaý jumysy jalǵasýda. Astana - Arqalyq - Torǵaı - Yrǵyz ýchaskesi boıynsha jobalyq-zertteý jumystary júrgizilýde. Naqtyraq aıtqanda, atalǵan dálizde boıynsha jobalyq-smetalyq qujatty aıaqtap, 2020 jyly qurylysty bastaý kózdelgen.

Aıta ketsek, Memleket basshysy 5 qazandaǵy Qazaqstan halqyna «Qazaqstandyqtardyń ál-aýqatyny ósýi: Tabys pen turmys sapasyn arttyrý» Joldaýynda «Nurly jol» jáne «Nurly jer» baǵdarlamalaryn 2025 jylǵa deıin uzartýdy tapsyrǵan bolatyn.

Sondaı-aq atqarylatyn jumystar nátıjesinde 2020 jylǵa deıin qosymsha 4 600 shaqyrym jol salynyp, jóndeletinin atap ótti.