Joldaý mindetteri: Qazaqstandyq taýarlardyń eksportyn arttyratyn memorandým jasaldy
Memorandýmda Qazaqstannyń eksport áleýetin arttyrýǵa baǵyttalǵan úshjaqty birlesken is-sharalar jospary qamtylǵan. Sonyń aıasynda otandyq taýarlardy óńirlik jáne álemdik naryqta belsendi ilgeriletýge asa mán beriletin bolady.
«Búgin Syrtqy ister mınıstrligi, «Atameken» UKP jáne «KazakhExport» kompanııasy elimizdiń eksport áleýetin arttyrý maqsatynda kúsh biriktirip, ózara kelisimge qoıý qoıdyq. Bul kelisim úshjaqty birigý nátıjesinde eksport salasyndaǵy kóptegen suraqtardy júıeli túrde sheshýge baǵyttalǵan. Búginde ekonomıkaǵa ınvestıtsııa tartý men eksport áleýetin arttyrýda ózara yntymaqtasý nátıjeli jumys ekenin jahandyq tájirıbe kórsetip otyr. Elimizge qyzyǵýshylyq tanytyp otyrǵan ınvestorlardyń óz jobalaryn júzege asyrý úshin barlyq múmkindik qarastyrylǵan jáne munda talap bárine birdeı. Sondyqtan biz úshin eksporttyq áleýetimizdi arttyrýda ınvestıtsııa tartý mańyzdy kórsetkish», - dedi QR Syrtqy ister mınıstri Qaırat Ábdirahmanov.
Sonymen qatar mınıstr atalǵan kelisim eksporttyq áleýetti arttyrý turǵysynan ǵana emes, ishki naryqty otandyq taýarlarmen qamtamasyz etý úshin de mańyzdy ekenin atap ótti.
Óz kezeginde QR Investıtsııalar jáne damý vıtse-mınıstri Qaıyrbek Óskenbaev elimizdiń búgingi eksporttyq jaǵdaıyna toqtala kele, jyl saıyn 450 otandyq kásiporyn memleket tarapynan eksporttyq servıstik qoldaý sharalarymen qamtylatynyn aıtyp ótti. «Kelesi jyly shetelde elimizdiń taǵy birneshe saýda ókildigi ashylady, atap aıtqanda, Reseı (Máskeý, Qazan, Ekaterınbýrg), Ózbekstan (Tashkent), Qytaı (Beıjiń, Úrimshi), BAÁ (Ras-el-Haım), Qyrǵyzstan (Bishkek) jáne Belarýste (Mınsk)», - dedi ol.
Sol sııaqty vıtse-mınıstr, aǵymdaǵy jyldyń aıaǵyna deıin qazaqstandyq 35 óndirýshige 200-den astam sheteldik satyp alýshynyń qatysýymen bes is-shara uıymdastyrý josparlanǵanyn tilge tıek etti.
Eske salsaq, Elbasy bıylǵy 5 qazandaǵy Joldaýynda Úkimetke óńdeý ónerkásibi men shıkizattyq emes sektor eksportyn qoldaýǵa aldaǵy 3 jylda qosymsha 500 mıllıard teńge bólýdi tapsyrdy. Jáne basymdyǵy bar jobalarǵa qoljetimdi nesıe berý úshin Ulttyq bankke keminde 600 mıllıard teńge kóleminde uzaq merzimge qarjy bólýdi mindettedi.