Joldaý halyq pen bılik arasyndaǵy alshaqtyqty azaıtady – Zákirjan Mamlıýtov

PETROPAVL. QazAqparat – Soltústik Qazaqstan oblysyndaǵy «QZ MEDIA PORTAL» medıa agenttiginiń dırektory Zákirjan Mamlıýtovtyń pikirinshe, Prezıdent Qasym-Jomart Toqaevtyń bıylǵy Joldaýy halyqqa úmit syılap, olardyń bılikke degen senimin qaıtarýy múmkin. Jýrnalıst alǵan áserimen QazAqparat tilshisimen bólisti.

«Osy jolǵy Joldaýdy shabyttana tyńdadym. Óıtkeni koronavırýs pandemııasynan keıin eldegi kóptegen máselelerdiń beti ashyldy. Buǵan deıin aıtylmaı kelgen, kórsek te kórmegendeı bolǵan máselelermen betpe-bet keldik. Maǵan, burynǵy sportshyǵa, aldymen Prezıdenttiń kásibı sport klýbtaryn memleket esebinen qarjylandyrýdy toqtatý kerek degeni unady. Bul óte durys, olardy kommertsııalyq uıymdar ustap, mundaı klýbtar ózderi qarjy tabýy qajet. Odan da qomaqty somaǵa buqaralyq, balalar sportyn damytyp, aýlalarda sport alańdaryn salǵan durys», - deıdi Zákirjan Mamlıýtov.

Jýrnalıstiń pikirinshe, bul jolǵy Joldaý indetten keıin senimsizdik paıda bolǵan halyqqa kúsh bergendeı boldy. Memleket basshysy ár máselege jeke-jeke toqtap, qolaısyz jaǵdaıdan shyǵý joldaryn kórsetti.

«Jınaqtaýshy zeınetaqy qorynan 30-40 jyldan keıin emes, qazirgi ýaqytta aqsha sheshýge bolatyndyǵy qýantty. Qazaqstandyqtarǵa bul aqshany belgili bir maqsatta jumsaýǵa múmkindik týyp otyr. Osy jınaǵan qarajatymyzǵa qatysty qanshama sybaılas jemqorlyq daýy týǵany bárimizge belgili. Endi ol aqshany ózimiz tıisinshe jumsaı alamyz. Máselen, bankke salyp, páter alýǵa bolady nemese oqýdyń aqshasyn tóleýge, emdelýge jumsaýǵa bolady. Men úshin bul óte jaqsy jańalyq», - deıdi jýrnalıst.

Zákirjan Mamlıýtovtyń aıtýynsha, eldegi bilim berý salasy sońǵy ýaqytta synnan kóz ashpaı keledi.

«Prezıdent óz sózinde bilim berý reformasynyń jalǵasatynyn aıtty. Sonyń ishinde shalǵaı aýyldardy ınternetpen qamtý. Meniń oıymsha, qazir osy salada júrgizilip jatqan jumystar oń nátıjesin beredi. Alaıda qatań baqylaý qajet.

Petıtsııa týraly ıdeıa unady. Endi biz qazaqstandyqtar demokratııalyq qoǵamdastyq retinde óz pikirimizdi arnaıy qurylǵan platformalarda bildire alamyz. Eger de bir máselede pikir bildirgender sany 50-100 myńnan asyp ketip jatsa, onda bizdiń únimizge qulaq asatyn bolady», - deıdi agenttik dırektory.

Zákirjan Mamlıýtov «Nur Otan» partııasynyń praımerızine qatysyp, úmitker retinde tirkeýden ótti. Onyń qazirgi máslıhat depýtattarynyń jumysyna kóńili tolmaıdy. Qoǵam belsendisiniń sózinshe, sózden iske kóshetin ýaqyt jetti.

«Máslıhat depýtattaryn kópshilik bile bermeıdi. Olar qoǵamnan alshaq, ne istep jatqandary belgisiz. Sol sebepti depýtattarǵa halyq sene bermeıdi. Prezıdent aıtqandaı, máslıhat depýtattarynyń qatysýymen onlaın jıyndar ótetin bolsa, olardy saılaýshylar tanıdy, saılaýaldy ýádelerin qalaı oryndap jatqanyn biletin bolady», - deıdi ol.

Zákirjan Mamlıýtov Joldaýda aıtylǵan Úkimetke júktelgen mindetter halyqtyń ál-aýqatyn jaqsartýǵa baǵyttalǵanyn aıtady.

«Jalpy, Prezıdenttiń aıtqandary, josparlary maǵan unady. Endi sol qoıylǵan mindetterdiń eń bolmaǵanda jartysy oryndalatyn bolsa, bizdiń ómir súrý deńgeıimiz jaqsarady. Buǵan deıin elimiz toqyraýdy bastan keshirip jatyr, esh ózgeris joq degen pikirler qalyptasty. Halyq pen bılik arasy alshaqtap ketkendeı boldy. Osy Joldaý arqyly ol ara qashyqtyq qysqarady dep oılaımyn. Halyq – bıliktiń qaınar kózi. Osyǵan sáıkes elde qandaı ister qolǵa alynbasyn ol el ıgiligi, qarapaıym halyq úshin jasalýy tıis», - dep sózin qorytyndylady «QZ MEDIA PORTAL» medıa agenttiginiń dırektory Zákirjan Mamlıýtov.