Joldaý el tutastyǵyn qamtamasyz etýge, syrtqy bedelin arttyrýǵa baǵyttaldy- Nurlan Orazalın

ALMATY. QazAqparat – QR Prezıdenti Qasym-Jomart Toqaevtyń halyqqa Joldaýy asa bir tarıhı qıyn, kúrdeli kezeńde joldanyp otyr. Mundaı pikirdi aqyn, Memlekettik syılyqtyń ıegeri Nurlan Orazalın bildirdi, dep habarlaıdy QazAqparat tilshisi.

«Bul Joldaýynda Qasym-Jomart Kemeluly, eń áýeli, halyqtyń áleýmettik-turmystyq jaǵdaıyna mán berdi. Búgingi kúniń problemasyn kóterdi. Azyq-túlik baǵasynyń turaqsyzdyǵyna erekshe toqtaldy. Qazirgi tańda ár jerde ár túrli baǵamen satylyp jatqan azyq-túlikke jol bermeý kerektigi aıtyldy. Meniń kókeıime qonǵan taǵy bir nárse – halqymyzdyń 40 paıyzynan astamy aýyldyq jerde turady. Búginde jerdi sheteldikterge satýǵa jáne jalǵa berýge tyıym salynǵany belgili. Aýyldy jetildirý úshin jerdi ıgerý máselesine nazar aýdardy. Memleket basshysy jaıylymdyq jerlerdi orynsyz paıdalanatyndar sharýa qojalyqtarynyń ósip-ónýine múmkindik bermeı otyr degendi ashyp aıtty»,- deıdi aqyn.

Sonymen qatar, ol Joldaýda oqý-aǵartý isin damytýǵa qatysty biraz jaqsy jańalyqtar aıtylǵanyn atap ótti.

«Ǵylymdy damytý, grant merzimin 5 jylǵa kóshirýi men granttyń oryndalýyn tekserip otyrýy. Bul aınalyp kelgende, eldiń ishki damýyn qamtamasyz etetin krıterıı dep esepteımin. Muǵalimderge bıyl da qoldaý kórsetiledi. Álbette, balalardyń saýatty, bilimdi bolýy mańyzdy, olar bizdiń bolashaǵymyz. Alaıda, bıýdjetten qamtamasyz etilip otyrǵan basqa da mamandar bar. Mysaly, mádenıet, sport salasy. Aldaǵy 2022 jyldyń 1 qańtarynan bastap osynyń báriniń jalaqysyn ósiredi jáne arǵy jyldarda da 20 paıyzdan qosyp otyrýdy jalǵastyrmaq. Osylaısha eldiń turmystyq jaǵdaıyn kóteredi. Bul durys dep oılaımyn»,- deıdi Nurlan Orazalın.

Joldaý barysynda respýblıkadaǵy eń tómengi jalaqy kólemin 42 500 teńgeden 63 000 teńgege deıin kóterý týraly tapsyrma berildi.

« Sonymen qatar, turǵyn úı máselesi syndy taqyryptardy qamtý eldiń ekonomıkalyq, áleýmettik jaǵdaıyn retke keltirýdiń naqty usynystary bolyp tur. Bul da durys. Bizdiń qansha otandastarymyz sol zeınettik jasqa jetpeı ketip qalyp jatyr. Ásirse, pandemııa kezinde talaı asyldarymyzdan aıyrylyp qaldyq. Bir sózben aıtqanda Memleket basyshysy áleýmettik-turmystyq jaǵdaıdy retteýdi tıisti úkimet organdaryna naqtylap berdi»,- deıdi ol.

Sóz sońynda Nurlan Orazalın Joldaý eldiń ishki tutastyǵyn qamtamasyz etýge, syrtqy abyroı, bedelin arttyrýǵa baǵyttalǵanyn tilge tıek etti.