Joldaý el tarıhyndaǵy asa mańyzdy qujat - SІM orynbasary

KÓKShETAÝ. QazAqparat -  Aqmola oblysyna jumys saparymen kelgen Qazaqstan Respýblıkasy Syrtqy ister mınıstriniń orynbasary Ǵalymjan Qoıshybaev óziniń Şýchedegi shańǵy bazasyna tánti bolǵandyǵyn aıtty, dep habarlaıdy QazAqparat tilshisi.

QR Prezıdenti Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda belgilengen mindetterdi halyqqa túsindirý maqsatyndaǵy sapar barysynda vıtse-mınıstr Býrabaı aýdanyndaǵy eńbek ujymdarymen kezdesip, mańyzdy qujatta qamtylǵan ózekti máselelerdi talqylady.

Şýche qalasyndaǵy shańǵy bazasynda bolǵanynda vıtse-mınıstr qysqy sport túrleri boıynsha «Olımpıadalyq daıarlyq ortalyǵy» respýblıkalyq memlekettik qazynalyq kásipornyn aralap kórip, qazirgi zamanǵy sporttyq quraldarmen jabdyqtalǵan ortalyqtyń materıaldyq-tehnıkalyq jaǵdaıymen tanysty. Sondaı-aq, eńbek ujymymen jáne sportshylarmen kezdesip, Joldaýdyń basty mindetterin túsindirdi. Vıtse-mınıstr Olımpıadalyq daıarlyq ortalyǵyn əlemdik deńgeıdegi sport nysany ekenin atap ótti.

«Səýleti men səni kelisken mundaı nysan sheteldik sportshylar men týrısterdi jəne qonaqtardy tartýda mańyzdy bolmaq. Osyndaı zamanaýı sporttyq nysandarymyz ben sportshylarymyzdyń arqasynda Qazaqstannyń əlemdik arenada bedeli arta túsedi», - dedi kezdesýde Ǵalymjan Qoıshybaev.

Sodan keıin Şýche qalasyndaǵy №7 mektep-lıtseıiniń bilim berý salasyndaǵy jetistikterine nazar aýdardy jáne «Rýhanı jańǵyrý» bólmesinde qoǵam ókilderiniń qatysýymen ótken dóńgelek ústelge qatysty. Kezdesýde qoǵam ókilderiniń usynys-tilekterine qulaq túrdi.

«Bul jolǵy Joldaý elimizdiń áleýmettik-ekonomıkalyq damýyna oń yqpal etip, jańa serpilisterge ekpin beretini sózsiz. Bul qujattyń mańyzdylyǵy - onda halyqtyń tabysy men turmys sapasyn arttyrý jaıy qamtylǵan. Ǵylym, bilim berý, densaýlyq jəne sport salasyna kóńil bólinýi, eń tómengi eńbekaqy kóleminiń ósýi arqyly halqymyzdyń áleýeti kóteriletini sózsiz. Joldaýda kórsetilgen alty baǵytty júzege asyrý arqyly halyqtyń turmys jaǵdaıy jaqsarady. Osy turǵydan kelgende bıylǵy Joldaý el tarıhyndaǵy asa mańyzdy qujat bolyp tabylady», - dedi Ǵalymjan Qoıshybaev.

Sonymen qatar, vıtse-mınıstr kýrortty óńirde týrıster jıi aıaldaıtyn jaqynda ashylǵan Býrabaı meshiti men Vızıt ortalyǵynda boldy.