Joldamamen jumysqa barmaǵan 100-ge jýyq dáriger grant shyǵynyn ótedi

NUR-SULTAN. QazAqparat – 91 jas dáriger joldamamen jumysqa barmaǵany úshin grant shyǵynyn ótedi. Bul týraly Májilis depýtattarynyń saýalyna QR Premer-Mınıstriniń orynbasary Eraly Toǵjanovtyń jaýabyna aıtylǵan, dep habarlaıdy QazAqparat tilshisi.

«Medıtsınalyq kadrlardy aýyldyq eldi mekenderge tartý jumystary úsh baǵytta júrgiziledi: óńir qajettiligine sáıkes túlekterdi jumysqa ornalastyrý, áleýmettik paket usyný, memlekettik bilim berý tapsyrysyn bólý. 2019 jyldan bastap túlekterdi óńirlik qajettilikterge sáıkes joldaýdy Densaýlyq saqtaý mınıstrliginiń túlekterdi/jas mamandardy bólý jónindegi komıssııasy júrgizedi»,- dep atap ótedi vıtse-premer jaýabynda.

Onyń atap ótýinshe, sońǵy 3 jylda Komıssııa jumysqa jibergen túlekterdiń arasynda dálelsiz sebeptermen joldama berilgen eldi mekenge jumysqa barmaý faktileri orta eseppen shamamen 8 paıyzdy quraıdy. Naqtyraq aıtqanda, 2019 jyly – 2561 mamannyń 228-i, 2020 jyly – 2326 mamannyń 155-i, bıyl 3160 mamannyń 255-i joldamamen jumys ornyna barmaǵan.

«Mundaı túlekterge qatysty oqytý shyǵyndaryn qaıtarý is-sharalary qoldanylady. Qarjy ortalyǵynyń aqparaty boıynsha, bilim berý granty boıynsha medıtsınalyq mamandyqtarda oqýdy bitirgen jáne jumys oryndaryna shyqpaǵan 91 jas maman oqytý shyǵyndaryn (respýblıkalyq bıýdjetke 200 mln teńge) ótegen. Mindettemeni oryndamaǵan basqa túlekterge qatysty jumystar jalǵasýda. Bıyldan bastap bilim berý granty boıynsha oqýǵa túsken túlekterdi jumysqa ornalastyrý sharttary jeńildetildi. Endi túlekter memlekettik mekemelerde ǵana emes, jeke uıymdarda da jumys isteı alady», - dedi Eraly Toǵjanov.