«Joldaǵy qabyldaýǵa» qyzylordalyqtardyń deni quqyqtyq máselemen júgindi

QYZYLORDA. QazAqparat - Qyzylorda oblysy aýmaǵynda «Jolda qabyldaý» respýblıkalyq aktsııasy ótti. Ekikúndik shara barysynda polıtseıler turǵyndarmen kezdesip, túsindirý jumystaryn júrgizdi. Bul týraly QazAqparat tilshisi Qyzylorda oblystyq Polıtsııa departamentiniń baspasóz qyzmetine silteme jasap habarlaıdy.

Polıtsııa bólinisteri basshylarynyń turǵyndarmen jeke kezdesýin qamtamasyz etý maqsatynda ótken bul aktsııa oblystyń barlyq aýdandarynda jáne aımaq ortalyǵynda tıisti deńgeıde uıymdastyryldy.

Aldyn ala belgilengen oryndarda «Jolda qabyldaý» jazýy bar avtobýstar ornalastyrylyp, polıtseıler mobıldik qabyldaý júrgize bastady. Olar quqyqtyq keńes berip, qajet bolǵan jaǵdaıda zań turǵysynda kómek kórsetti.

Eki kún boıy Halyqqa qyzmet kórsetý ortalyǵy, tirkeý-emtıhan bólinisteri, jol-tehnıkalyq baqylaý jáne ákimshilik praktıka mamandary da jumys istedi. Shaqyrylǵan mamandardyń barlyǵy óz salalary boıynsha qandaı da bir máselemen kelgen azamattardyń suraqtaryna jan-jaqty jaýap berip, keń kólemdi keńester berdi.

Nátıjesinde óńir boıynsha 1 myńǵa jýyq turǵyn keńes aldy. Olardyń kóbisi quqyqtyq máseleler boıynsha júgindi.