Jolaýshylardyń alǵashqy panasy: jolshylardyń jylytý beketteri

Ulan-ǵaıyr qazaq dalasynyń ár óńiriniń ózine tán ereksheligi men tabıǵaty bar. Bir oblysynda jaýyn jaýyp, kóktaıǵaq bolsa, birinde qarly boran burqap turady. Qaı jaǵdaıda da jolshylar úshin jolaýshylardyń qaýipsizdigi men jaılylyǵy birinshi kezekte bolmaq.

Osy oraıda, respýblıkalyq mańyzy bar avtomobıl joldarynyń boıynda aqtútek boran kúnderi jolaýshylardyń dittegen jerlerine aman-esen jetýleri úshin jaǵdaı jasalyp jatyr. Kólik aǵyny kóp kúre joldardyń boıy qardan arshylǵansha, jolaýshylar jáne kezek almasqan jolshylar tońyp qalmaýy úshin elimizde 125 jylytý beketi jóndeýden ótkizilip, iske qosylyp jatyr. Jolshylardyń bul jylytý beketteri arnaıy tósek oryndarymen, ashanamen jáne sanıtarlyq toraptarmen jabdyqtalǵan.

Ókinishke oraı, jyldan-jylǵa daýyldy eskertýler men jol júrý shekteýlerine qaramastan, jolǵa shyǵatyn jolaýshylar sany azaımaı tur. Al olardyń basym bóligi qys mezgilinde qar qursaýynda qalyp qoıyp jatady.

Tek ótken qystyń ózinde, jolshylardyń kúshimen 720 avtokólik qar qursaýynan bosatylyp, onyń ishinde 400-ge jýyǵy «QazAvtoJoldyń» jyly bokstaryna jetkizilse, 2 000-nan astam adam jylytý beketterine ornalastyryldy.

Qurmetti jolaýshylar, «QazAvtoJol» UK AQ sizderden jolda abaı bolýlaryńyzdy, bekitilgen jyldamdyq jáne jol júrý shekteýlerin qatań saqtaýlaryńyzdy suraıdy. Al shtattan tys jaǵdaılar týyndaǵan kezde sizder árqashan 1403 biryńǵaı koll ortalyǵyna qońyraý shala alatyndaryńyzdy esterińizge salamyz.

Foto: pixabay.com