Jolaýshylardy bıletsiz tasymaldaǵandarǵa 13 mln teńge aıyppul salyndy

NUR-SULTAN. QazAqparat – QR Indýstrııa jáne ınfraqurylymdyq damý mınıstrliginiń Kólik komıteti poıyzdarǵa reıdtik tekserý júrgizdi, dep habarlaıdy QazAqparat tilshisi.

«Bıyl aýmaqtyq kóliktik baqylaý organdary 534 jolaýshy poıyzyn tekserip, bıletsiz jolaýshylar, rásimdelmegen júk, tasymal tártipterin buzý faktilerin anyqtady. Bıletsiz jolaýshy tasý men talaptardyń buzylǵany úshin jalpy 13 mln teńge aıyppul salyndy», - dedi QR IIDM Kólik komıteti tóraǵasynyń orynbasary Jánibek Taıjanov mınıstrlikte ótken baspasóz máslıhatynda.

Odan bólek, Komıtet 30 shilde men 7 tamyz aralyǵynda bılet alypsatarlaryn anyqtaý naýqanyn júrgizgen.

«Aktsııa aıasynda 148 zańbuzýshylyq anyqtaldy, onyń jeteýi - jol júrý bıletin alyp satqandar, 141 - poıyzǵa bıletsiz mingender. Olarǵa 843 myń teńge aıyppul salyndy», - dedi J. Taıjanov.