Jolaýshylar tasymaly salasyndaǵy jol kartasy jasaldy

NUR-SULTAN. QazAqparat – QR Indýstrııa jáne ınfraqurylymdyq damý mınıstrligi elimizdiń qoldanystaǵy zańnamasyn buzatyn avtomobılmen jolaýshylardy tasymaldaý qyzmetiniń jolyn kesý boıynsha arnaýly jol kartasyn qabyldady, dep habarlaıdy QazAqparat tilshisi.

Atalǵan mınıstrliktiń málimetinshe, jol kartasynda jolaýshylardy avtomobılmen tasymaldaý naryǵynyń jaı-kúıin taldaý, ulttyq zańnama normalaryn túgendeý jáne túsindirý, sondaı-aq belgilengen talaptardyń saqtalýyn qamtamasyz etý jóninde birlesken is-sharalar kózdelgen.

Atalǵan qujat 2021 jylǵy qyrkúıekte QR Úkimetimen bekitilgen Kóleńkeli ekonomıkaǵa qarsy is-qımyl jónindegi 2021-2023 jyldarǵa arnalǵan keshendi is-sharalar josparyn oryndaý aıasynda ázirlengen. Dál osy josparǵa sáıkes Indýstrııa jáne ınfraqurylymdyq damý, Іshki ister, Qarjy, Ulttyq ekonomıka, Aqparat jáne qoǵamdyq damý, Tsıfrlyq damý, ınnovatsııalar jáne aeroǵaryshtyq ónerkásip mınıstrlikteriniń, sondaı-aq «Atameken» UKP jáne basqa da múddeli uıymdardyń ókilderi kiretin vedomstvoaralyq jumys toby qyzmet etýde.

«Aıta keterligi, QR Indýstrııa jáne ınfraqurylymdyq damý mınıstrligi avtomobılmen jolaýshylar tasymaly salasynda zańnama talaptaryn saqtaýdy qamtamasyz etý boıynsha jumysty turaqty túrde júrgizip keledi. Osylaısha, QR Іshki ister mınıstrligimen birlesken is-sharalar barysynda 2021 jyly 280 reıdtik tekserý júrgizilip, nátıjesinde 390-nan astam ákimshilik is toltyryldy. 8,2 mln teńge sommasynda aıyppul salyndy. Kóliktik baqylaý beketterinde 1500 ákimshilik iske hattama jasalyp, 10 mln teńgeden astam sommaǵa aıyppul salyndy», - dep atap ótedi vedomstvodan.