Jolaýshylar bıletiniń aqshasy tolyq kólemde qaıtarylady – QTJ

NUR-SULTAN. QazAqparat - Tótenshe jaǵdaı jarııalanýyna baılanysty «Qazaqstan temir joly» ulttyq kompanııasy jolaýshylar bıletiniń aqshasyn tolyq kólemde qaıtarý týraly sheshim qabyldady, dep habarlaıdy QazAqparat tilshisi.

«Elimizdegi tótenshe jaǵdaıǵa baılanysty búgin kassalarda bılet qunyn qaıtarý boıynsha júkteme aıryqsha joǵary boldy. Qaıtarylǵan bıletterdiń aqshasy tólyq kólemde, eshqandaı aıyppul ustalmaı beriledi. Barlyq kassa táýlik boıy kúsheıtilgen rejimde jumys isteýde», - deıdi «Jolaýshylar tasymaly» AQ Marketıng jáne satý departamentiniń dırektory Almas Aıtbaev.

Onyń aıtýynsha, qoǵamdyq orynda adamdar kóp jınalyp qalmas úshin jolaýshylar túsinistik tanytyp, bılet aqshasyn qaıtaryp alýǵa keıinirek – 6 aı ishinde kelýine bolady.

«Kezekte turǵan adamdar óte kóp bolǵandyqtan, keıbir kassalarda ǵana qajetti kólemde qolma qol aqsha tapshylyǵy boldy. Al jalpy alǵanda kassalar qarajatpen tolyq qamtamasyz etilgen. Koronavırýstyń taralý qaýpin azaıtý maqsatynda qaıtarylǵan bılettiń aqshasyn alty aı kólemi ishinde ózińizge yńǵaıly kez kelgen ýaqytta kelip alýdy usynamyz», - deıdi ol.