Jolaýshylar avtokóligi qyzmetteriniń baǵasy 1 jylda 6 paıyzǵa qymbattady
2020 jyldyń qańtar-tamyzynda avtomobıl jáne qalalyq elektr kólikterimen 7 mlrd adam tasymaldandy. Bul osydan 1 jyl burynǵy kórsetkishten 2,2 esege tómen. Al tamyz aıynda 260,9 mln jolaýshy tasymaldanyp, kórsetkish shildemen salystyrǵanda 5,4 paıyz joǵary bolǵanymen 2019 jyldyń tamyzyna qaraǵanda 7,9 esege kemidi. Jolaýshylar aınalymy jyl ishinde 2,3 esege azaıyp, 75 mlrd jolaýshy-shaqyrym boldy. Tamyzda jolaýshylar aınalymy 3,1 mlrd jolaýshy-shaqyrymǵa jetip, osy jyldyń shildesimen salystyrǵanda 9,1 paıyz ósim kórsetti. Degenmen, 2019 jyldyń tamyzymen salystyrǵanda bul kórsetkish 7,3 paıyzǵa kem.
Avtomobıl jáne qalalyq elektr kólikterimen tasymaldanǵan jolaýshylardyń eń kóbi ádettegideı avtobýstar men taksılerge tıesili. Avtobýstarmen 5 mlrd jolaýshy tasymaldandy. Bul ótken jyldyń kórsetkishinen 2,3 esege az. Taksımen 2 mlrd adam tasymaldanyp, 2019 jylǵy kórsetkishpen salystyrǵanda 48,7 paıyzǵa tómendedi. Avtomobıl kólikterimen 2 mlrd tonna júk jáne qol júgi tasymaldanyp otyr. Kórsetkish ótken jylmen salystyrǵanda 8,5 paıyzǵa kemidi. Júk aınalymy 98,7 mlrd tonna-shaqyrymǵa jetkenimen bir jyl burynǵy kórsetkishke qaraǵanda 14,3 paıyzǵa tómendedi. Tamyzda júk aınalymy kólemi shildemen salystyrǵanda 3,4 paıyzǵa artyp, 14,9 mlrd tonna-shaqyrym boldy. Degenmen, ótken jyldyń tamyzymen salystyrǵanda 15,4 paıyzǵa kem.
Osy jyldyń 8 aıynyń qorytyndysynda avtomobıl jáne qalalyq elektr kólikteriniń kirisi 152,9 mlrd teńgege bolǵanymen bir jyldyń ishinde 11,6 paıyzǵa quldyrap otyr. Ótken jyly olardyń kiristeri 173 mlrd teńgege jetip, jyl ishinde 8,2 paıyzka artqan edi.
Tamyzda jolaýshylar kóligi qyzmetteriniń baǵasy ótken jyldyń tamyzymen salystyrǵanda 5,7 paıyzǵa qymbattady. Tek Shymkent qalasynda ǵana baǵa ózgerissiz qaldy. Qyzmet baǵasynyń eń joǵary ósimi Túrkistan oblysynda 28,1, al mańǵystaý oblysynda 25,4 paıyz boldy.