Jolaýshy tasymaldaıtyn kompanııalarǵa sýbsıdııa berý tártibi ózgeredi

<p>ASTANA. KAZINFORM - Temirjol baǵytynda qyzmet kórsetetin kompanııalarǵa talap kúsheıtilmek, dep habarlaıdy QR Kólik mınıstrligi Temirjol jáne sý kóligi komıtetiniń baspasóz qyzmeti.&nbsp;</p>

Málimetke saı, jolaýshylarǵa qyzmet kórsetý sapasy, poezdardyń jaı-kúıi men tazalyǵy jáne talapqa saı standarttyq normalarǵa baılanysty sýbsıdııa berý máselesin qarastyrý josparǵa engizildi.

Atalǵan komıtet ókilderi jolaýshylar poıyzyna kezekti tekserý jumystaryn júrgizdi. Bul jolǵy nysan «Túrksib-Astana» JShS qyzmet kórsetetin Qostanaı – Almaty baǵytyndaǵy №43/44 áleýmettik mańyzy bar jolaýshylar poezdy. Tekserý barysynda 14 túrli zań buzýshylyqtar anyqtaldy. Jolaýshylar vagondarynyń ishki jáne syrtqy kelbetiniń normalaryna sáıkes kelmeýi, kondıtsıonerleri qarastyrylǵan biraq sol jeldetkishi isten shyqqan vagondardyń qatynaýy jáne sanıtarlyq talaptarǵa saı kelmeýi negizgi zań buzýshylyqtar retinde tirkeldi.

Tekseris jumystarynyń nátıjeleri boıynsha tıisti akt jasaldy. Óz kezeginde tasymaldaýshy kompanııaǵa 10 kúntizbelik kún ishinde tekserý nátıjesinde anyqtalǵan zań buzýshylyqtardy joıý jáne olardyń odan ári oryn alýyna jol bermeý jóninde sharalar qabyldaý tapsyryldy.

Elimizde áleýmettik mańyzy bar turaqty 110 poıyz qatynaıdy. Jolaýshylardy tasymaldaý qaǵıdalarynyń talaptaryn qatań saqtaý komıtet nazarynda. Jaz sońyna deıin jaýapty komıtet qyzmetkerleri keste boıynsha qalǵan jolaýshylar poıyzdaryna da tekserý jumystaryn júrgizedi.