Jol jóndeý jumysynyń baǵasy avtomatty túrde belgilenetin bolady

ASTANA. QazAqparat - Dorsmeta baǵdarlamasy jol jóndeý jumystaryna smeta jasaý kezinde adamı faktordy joıady jáne sybaılas jemqorlyq táýekelderin azaıtady, dep habarlaıdy QR IIDM baspasóz qyzmeti.

QR IIDM Avtomobıl joldary komıtetiniń tapsyrysy boıynsha «QazjolǴZI» AQ mamandary respýblıkalyq mańyzy bar qalalyq joldar men avtomobıl magıstraldaryn kútip ustaýǵa, aǵymdaǵy jáne ortasha jóndeýge arnalǵan baǵalardy esepteý protsesterin avtomattandyrýǵa múmkindik beretin «tsıfrlyq smetalyq júıeni» qurýdy jalǵastyrýda.

«Dorsmeta» baǵdarlamasy esepteýlerdi naqtylaýǵa, belgili bir jumystardy oryndaý qunyn anyqtaıtyn qarjylyq qujattardy daıyndaýdy jedeldetýge arnalǵan. Taǵy bir mańyzdylyǵy – tapsyrys berýshilerdiń nemese jol jóndeý merdigerleriniń esep aıyrysý kezinde adamı faktordy boldyrmaýy jáne sybaılas jemqorlyq táýekelderin azaıtýy.

«Buǵan deıin ortasha jóndeý boıynsha smetalyq qujattama qolmen jasalatyn. Ár maman ondaǵan arnaıy jınaqty qarap, baǵalardy engizýge májbúr bolatyn. Bul birinshiden uzaq, ekinshiden senimsiz. Sebebi, qatelikter ketip qalý yqtımaldyǵy joǵary. Kóptegen standarttary bar avtomattandyrylǵan esepteý júıesi úlken qatelikterdiń aldyn alýǵa septigin tıgizedi. Mysaly, bir artyq san engizilip ketse, baǵdarlamanyń ınterfeısi birden qatelikti kórsetedi», – deıdi «QazjolǴZI» AQ-nyń ınjener-smetashysy Jaına Samajanova.

Atalmysh baǵdarlama boıynsha jumystar 2019 jyldan bastap júrgizilýde, joba 2023 jyly paıdalanýǵa berilmek.