Jol jyly: Shyǵys Qazaqstanda bıyl 600 shaqyrymǵa jýyq jol jóndeledi
ShQO Jolaýshy kóligi jáne avtomobıl joldary basqarmasy basshysynyń mindetin atqarýshy Nurbek Turarovtyń aıtýynsha, osy joly Qalbataý-Maıqapshaǵaı, Taldyqorǵan-Óskemen, Osınov asýy respýblıkalyq joldaryn qaıta jańartý jalǵasady.
«QazAvtoJol UK» AQ respýblıkalyq mańyzy bar 200 shaqyrymǵa jýyq joldy, onyń ishinde Óskemennen Shemonaıha, Rıdder, Altaı, Semeı qalalary baǵyttary boıynsha joldy jóndeý máselesin qarastyrýda. Bıyl Shemonaıha qalasynda Úbe ózeni arqyly ótetin kópirdi qaıta jańǵyrtýdy bastaý josparlanyp otyr. Kópir 1962 jyly salynǵan. Sarapshylardyń qorytyndysy boıynsha kópir apatty dep tanylǵan, kóliktiń jalpy salmaǵy boıynsha shekteý engizilgen, keri qozǵalys uıymdastyrylǵan. Qazirgi ýaqytta jobalaýshyny anyqtaý boıynsha konkýrs ótkizilýde», - dedi ol.
Óskemen qalasynda Sátbaev pen Jibek Joly dańǵyldarynyń qıylysynda kólik aıryǵynyń, Permıtın men Slavskıı kósheleriniń qıylysynyń qurylysy jalǵasady. Almaty qalasyna shyǵatyn Jibek joly kóshesin, Bazovaıa kóshesin qaıta jańartý jobalary aıaqtalmaq. Sáýir-mamyr aılarynda «ÚMZ» AQ aýdanyndaǵy Úlbi ózeni arqyly ótetin Shnaıder kópirin qalpyna keltirý kózdelýde.
Eldi mekenderdiń joldary men kóshelerin ortasha jóndeýge 28,5 mlrd teńge bólinedi. Sonyń sheńberinde shamamen 600 shaqyrym jol jóndeledi dep kútilýde. Atap aıtqanda,
- Oblystyq mańyzy bar 222 shaqyrym jol,
- Aýdandyq mańyzy bar 153 shaqyrym jol,
- Eldi mekenderdiń 108 shaqyrym kósheleri,
- «Aýyl – el besigi» aıasynda aýdandyq mańyzy bar 88 shaqyrym kósheler men joldar,
- Aýdandardyń óz qarajaty esebinen 29 shaqyrym joldar men kósheler jóndelýi tıis.
«Jol jóndeý sapasyn Ulttyq sapa ortalyǵynyń mamandary tekseretin bolady. Aýyr júk kólikteriniń baqylaýsyz qozǵalysy saldarynan joldardyń zaqymdalmaýyn qamtamasyz etý maqsatynda oblystyq mańyzy bar joldarda salmaqtyq baqylaý júıelerin ornatý máselesi pysyqtalýda. Qazirgi ýaqytta joldardy jóndeý boıynsha tehnıkalyq qujattamany daıyndaýmen qatar, memlekettik satyp alý týraly zańnama sheńberinde konkýrstyq rásimder bastaldy», - dedi Nurbek Turarov.
Prezıdent Qasym-Jomart Toqaevtyń tapsyrmasymen Shyǵys Qazaqstan oblysyndaǵy Kúrshim men Samar aýdandaryn jalǵaıtyn «Qyzyl tý» ótkeline kópir salynyp jatqany belgili. Elimizdegi eń uzyn kópir bıyl qoldanysqa beriledi dep kútilýde.
«Buqtyrma sý qoımasy arqyly ótetin kópir jobasynyń baǵasy - 61,4 mlrd teńge. Búginde onyń 27,4 mlrd teńgesi ıgerildi. Uzyndyǵy 1153 metrdi quraıtyn tehnologııalyq kópir salyndy. Eki jolaqty negizgi avtomobıl kópiriniń uzyndyǵy 1316 metr, eni 12,2 metr bolady. Qazirgi ýaqytta 21 kópir tireginiń 13-i ornatyldy. 8 tirek boıynsha jumystar jalǵasýda. Aralyqtardyń 20 metall konstrýktsııasy daıyndalyp, ýchaskege jetkizildi. Qurylys jumystary kestege sáıkes júrip jatyr», - deıdi ShQO Jolaýshylar kóligi jáne avtomobıl joldary basqarmasy basshysynyń mindetin atqarýshy.
Taǵy bir mańyzdy joba – 2018 jyly bastalǵan Óskemen-Altaı baǵytyndaǵy Osınov asýynan tóte joldyń qurylysy. Altaı aýdanyndaǵy Buqtyrma sý qoımasyna jáne Katonqaraǵaı aýdanyna týrıster tek osy jol arqyly jetedi. Jol salýshylar baıqaýsyzda orman sharýashylyǵynyń jerine kirip ketkendikten toqtap qalǵan qurylys jumystary 2023 jyly qaıta jalǵasqan edi.
«Búgingi tańda 56-dan 72 shaqyrymǵa deıingi ýchaskege baılanysty jobaǵa túzetýler engizilgen. Konkýrs ótkizilip, merdiger kompanııa anyqtaldy. Ol – «Kurylys Group RK» JShS. Ótken jyly qazan aıynda kelisim jasaldy. Bıyl 3,9 mlrd teńge bólinip, onyń 2,9 mlrd teńgesi ıgerildi. 52-den 53 shaqyrymǵa deıingi aýmaqta jer qazý jumystary júrgizilip jatyr. 72-den 88 shaqyrymǵa deıingi ýchaskege qatysty jobaǵa túzetý engizilýde. Jalpy qurylys jumystary 2025 jyly aıaqtalady dep kútilýde. Sebebi jolda bıik tirekteri bar úlken jáne kúrdeli kópir salynýy tıis», - dedi N.Turarov.