Jol jabylatyny týraly eskertýdi elemeıtinder jaýapqa tartylýy múmkin

ASTANA. QazAqparat – Bıyl qazannan bastap kóktaıǵaq jáne qarly boranǵa baılanysty 232 kólik pen 563 adamǵa kómek kórsetilgen. Respýblıkalyq joldarda kólik qozǵalysyn 150-den astam ret shekteýge týra keldi. Bul týraly QazAqparat Indýstrııa jáne ınfraqurylymdyq damý mınıstrligine silteme jasap habarlaıdy.

Tótenshe jaǵdaılardyń aldyn alý úshin Avtomobıl joldary komıteti kólik júrgizýshilerine turaqty negizde daýyl týraly habarlamalardy jiberip, alys saparlarǵa shyqpaýǵa keńes bergenimen, buǵan nemquraıly tanytqan kóptegen adam qar qursaýynda qalyp jatady. Máselen, respýblıkalyq mańyzdaǵy avtojoldar qysqy kútip ustaý kezeńine aýystyrylǵan sátten bastap, jol salasynyń mamandardy kúre joldyń boıynda 600-ge jýyq adamǵa kómek kórsetken. Atap aıtqanda, aýa raıynyń qolaısyzdyǵyna baılanysty 232 kólik jyly bokstarǵa ornalastyrylsa, 563 adam jylytý pýnkterine jetkizildi.

Mınıstrlik avtomobıl joldaryn kútip ustaıtyn qyzmetkerlerdiń tehnıkasy kólikti qar qursaýynan shyǵarýǵa nemese evakýatsııalaýǵa beıimdelmegenine nazar aýdarady. Soǵan qaramastan, sala mamandary tıisti eskertýdi elemegen júrgizýshilerdiń batyp qalǵan kólikterin shyǵarýǵa májbúr. Nege deseńiz, joldy tazalaý úshin onyń boıynda qandaı da bir kedergi bolmaýy tıis.

Osy rette bıyldan bastap aýa raıynyń qolaısyzdyǵyna qatysty kólik qozǵalysyn shekteý jónindegi habarlamany eskermegen tulǵalarǵa ákimshilik jaýapkershilik qarastyrylmaq. Tıisti ózgeris Úkimettiń «Joldardaǵy kólik quraldarynyń qozǵalysyn toqtatý nemese ýaqytsha shekteý qaǵıdalaryn bekitý týraly» qaýlysyna engizildi.

«Taıaý aradaǵy merekelik demalys kúnderinde kóptegen adam qaladan tys jerde demalýdy josparlaıtyny málim. Osyǵan baılanysty Avtomobıl joldary komıteti kólik ıelerin daýyl týraly habarlamany alǵan boıda saqtyq sharalaryn ustanyp, uzaq saparǵa shyǵýǵa bas tartýdy suraıdy. Sondaı-aq, qandaı bir jaǵdaılar týyndaǵanda 1403 biryńǵaı call-ortalyǵyna habarlasýǵa bolatynyn eske sala keteıik», - delingen resmı habarlamada.