Jol sapasyna jaýapty mekemelerge 111 mln teńge aıyppul salyndy

ASTANA. QazAqparat – 2020-2022 jyldary jol sapasyna qatysty 81 tehnıkalyq qadaǵalaý mekemesine aıyppul salyndy. Bul týraly jol aktıvteriniń ulttyq sapa ortalyǵynyń dırektory Zamır Saǵynov málim etti, dep habarlaıdy QazAqparat tilshisi.

«Bıyl ulttyq ortalyq 29 myń jol materıalynyń sapasyn tekserdi. Tekserilgen materıaldardyń 24 paıyzy sapasyz degen qorytyndy jasaldy. Sapasyz materıaldar kóbine jergilikti joldarda qoldanylǵan. Sondyqtan joldardy qaıta saldy usyndyq. Aıta ketetin jaıt, bizde jol sapasyn tekseretin ınjenerlik kompanııa bar. Negizi sapany qadaǵalaıtyn solar. Al biz aıyna bir ret tekserip turamyz», - dedi Zamır Saǵynov ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, jol sapasyn tekserý men qadaǵalaýǵa qatysty sharalar jalǵasyn tabady.

«Bizdiń usynysymyz boıynsha 2020-2022 jyldary 81 tehnıkalyq qadaǵalaý mekemesine aıyppul salyndy. 56 attestat pen 72 lıtsenzııa toqtatyldy. Onyń ishinde 4 merdiger kompanııanyń lıtsenzııasy bar. Sol sııaqty jol sapasyn qadaǵalaıtyn mekemelerge 111 mln teńgege aıyppul salyndy», - deıdi ol.

Aıta ketsek, avtomobıl joldary komıtetiniń tóraǵasy Tólegen Abdýllın málimdegendeı, jyl sońyna deıin respýblıkalyq joldardyń 91 paıyzy talapqa saı bolady.

Sondaı-aq bıyl aqyly joldardan shamamen 25 mlrd teńge paıda tústi.