Jol sapasyna baılanysty ákimshilik-quqyqtyq jaýapkershilik engizilýi múmkin
Bul týraly QR Indýstrııa jáne ınfraqurylymdyq damý mınıstri Qaıyrbek Óskenbaev Úkimet otyrysynan keıin BAQ ókilderine bergen suhbatynda aıtty.
«Biz arnaıy taldaý ortalyǵyn qurdyq. Byltyr joldar boıynsha 100 myńnan astam skrın jasaǵan bolatynbyz. Kemshilikterdi anyqtap, merdigerlerge túzetkizgen edik. Sondyqtan respýblıkalyq mańyzdaǵy joldar boıynsha naqty tetik jolǵa qoıylǵan. Bul sanattaǵy joldardyń bárinde sapany baqylaý ortalyqtary bar. Jol qurylysy júrip jatqan kezde sol ortalyqtar táýlik boıy qadaǵalaý júrgizedi. Jergilikti mańyzdaǵy joldar boıynsha, ákimdikterge sapany baqylaý ortalyqtarymen kelisimshart ornatý usynamyz», - dedi ol jýrnalısterge Úkimettiń kýlýarynda.
Vedostvo basshysy bul baǵytta zańnamaǵa da ózerister engiziletinin jetkizdi.
«Biz zańǵa ózgerister engizdik. Jergilikti atqarýshy organdardy eldi mekenderdegi joldar boıynsha sapany baqylaý ortalyqtarymen kelisimshart jasaýdy mindettep otyrǵan joqpyz. Biraq ol joldardyń sapasyn da qadaǵalaýlary kerek. Sondaı-aq, jol qurylysyna qatysýshylarǵa qatysty ákimshilik jaýapkershilik engizdik. Onyń ishinde jol sapasy boıynsha da jaýapkershilik kózdelgen», - dedi Qaıyrbek Óskenbaev.
Aıtýynsha, atalǵan norma bıyl qabyldanýy múmkin.
«Kólik týraly zańda jol sapasy boıynsha ákimshilik-qylmystyq jaýapkershilik engizýdi usyndyq. Eldi mekenderdiń joldary boıynsha jergilikti atqarýshy organdarǵa tikeleı tapsyrma berildi. Olar jol jol sapasyn zertteýge quzyretti zerthanalar ashýy kerek nemese sondaı nysandarmen kelisimshart jasaýy qajet», - dedi mınıstr.
Sonymen qatar, mınıstr Batys Qazaqstandaǵy jol jóndeý jumystaryn 2024 jylǵa deıin aıaqtaýǵa ýáde berdi.