Jol salasy mamandarynyń biliktilik kýrstaryna suranys úsh ese ósti

ASTANA. QazAqparat - Elimizde avtomobıl joldaryn salýdyń sapasyn jaqsartý úshin jol qurylysyna arnalǵan negizgi materıaldardy jetkizýshiler asfaltbetonnyń jaramdylyq merzimin arttyrý maqsatynda polımerli qospalary bar modıfıkatsııalanǵan bıtým óndirisine kóship jatyr, dep habarlaıdy QR IIDM baspasóz qyzmeti.

Óndiristi jańǵyrtý aıasynda kásiporyndar arnaıy jabdyqtar satyp alyp, jumysta tyń tehnologııalar men hımııalyq qospalardy engizý qolǵa alyndy.

Óndiristik zerthanalardyń mamandaryn qosymsha oqytý maqsatynda Qazaqstandyq jol ǵylymı-zertteý ınstıtýty Almatydaǵy oqý ortalyǵynyń bazasynda bıtýmdy ustastyrǵyshty synaý boıynsha praktıkalyq semınar, sondaı-aq avtojoldardy salý men paıdalanýdaǵy jańa tehnologııalarǵa baılanysty biliktilikti arttyrý kýrsyn uıymdastyrdy.

Kezekti oqytý is-sharalaryna shymkenttik «Qazaqbıtým» JShS qyzmetkerleri qatysty. Óıtkeni olar qarapaıym bıtým óndirisinen ınnovatsııalyq polımerli bıtým ustastyrǵyshty shyǵarýǵa kóship jatyr.

«Bıtýmdy ózgertý – bizdiń klımattyq jaǵdaıymyzda jol salýǵa qolaıly bıtým alý úshin jaqsartatyn qospalardy engizý. Kompanııa zamanaýı jabdyqty satyp alǵanymen onyń mamandary olarmen qalaı jumys isteý kerektigin áli bilmeıdi. Sondyqtan olar bizge eýropalyq standart boıynsha jumys isteıtin zerthanamyzǵa óz bilimderin synap kórý jáne modıfıkatsııalanǵan bıtýmnyń fızıka-mehanıkalyq qasıetterin durys daıyndap, synaqtan ótkizý úshin kelip otyr»,– dedi «QazjolǴZI» synaq zerthanasynyń jetekshi ınjeneri Sákipjamal Begalıeva.

Onyń aıtýynsha, bıyl bilim berý kýrstarynyń kólemi 2021 jylmen salystyrǵanda 3 ese ósti. Bul avtojol salasyndaǵy ınnovatsııalarǵa degen qyzyǵýshylyqtyń kúrt artýyna baılanysty.

«Jańa tehnologııalardyń damýymen jol salasy da ózgere bastady. Sondyqtan bizge oqytý kýrsy qajet. Zerthanashylarymyzdyń kásibı kókjıegi keńeıip, basqa jabdyqtarmen jáne synaq ádisterimen jumys istegenin qalaımyn. Biz ınstıtýttan polımerli bıtýmdy ustastyrǵyshtarmen jumys isteýge kóbirek ýaqyt bólýdi suradyq, óıtkeni olar qazir jol qurylysshylary arasynda suranysqa ıe», dedi «Qazaqbıtým» JShS zerthanasynyń meńgerýshisi Aqtolqyn Qadyr.

Atalǵan kýrs aıaqtalǵannan keıin qatysýshylar tıisti sertıfıkattar alady.

Memleket basshysynyń avtomobıl joldarynyń sapasyn jaqsartý jónindegi tapsyrmasyna sáıkes ári Indýstrııa jáne ınfraqurylymdyq damý mınıstrliginiń talaby boıynsha «QazjolǴZI» AQ mamandary jol qurylysy salasyndaǵy kásiporyndarda jumys isteıtin qyzmetkerlerdi oqytýǵa jáne olardyń biliktiligin arttyrýdy kózdeıtin beıindik zańnamaǵa túzetýler engizip, jumys istep jatqanyn atap ótken jón.