Jol polıtsııasy júıke aýrýlaryna shaldyqqandardy kólik basqarý quqyǵynan aıyrýǵa qulyqsyz - Bas prokýratýra

ASTANA. QazAqparat - Ákimshilik tájirıbege jasalǵan taldaý kórsetkendeı, sot arqyly turǵylyqty jeri boıynsha emdeý taǵaıyndalǵan júıke aýrýlary bar adamdar azamattyq-quqyqtyq mámileler jasap, óndiristerde jumys istep, avtokólik quraldaryn basqaryp kelgen.

Bul rette jol polıtsııasy organdary mundaı azamattardy kólik basqarý quqyqtarynan aıyrý týraly másele kóterýge qulyqsyz. Bul týraly Bas prokýror Ashat Daýylbaevtyń tóraǵalyǵymen ótken alqa májilisinde aıtyldy, dep habarlaıdy Bas prokýratýranyń baspasóz qyzmetinen. Mundaı 208 derek anyqtalǵan. Zańda kórsetilgendeı, ishki ister organdary sotqa kólik quralyn basqarýǵa densaýlyǵy jaramaıtyn adamdardyń kólik basqarý quqyqtaryn toqtatý týraly talap aryz engizýleri tıis. Bul ásirese, júıke aýrýlarymen syrqattanǵan adamdarǵa qatysty. Prokýrorlardyń aralasýynan keıin 115 adamnyń kólik basqarý quqyqtaryn toqtatý týraly sotqa talap aryz engizildi, búginde olardyń 61-i qanaǵattandyryldy. Jıyn qorytyndysynda Іshki ister mınıstrligine júıke aýrýyna shaldyqqan azamattardy kólik quralyn basqarý quqyǵynan aıyrýǵa tıimdi sharalar qabyldaý, sondaı-aq júıke aýrýlarymen syrqattanǵan adamdardyń qoǵamdyq qaýipti áreketterin ýaqtyly eskertý maqsatynda densaýlyq saqtaý mekemelerimen ózara tyǵyz is-qımyl jasasýdy qamtamasyz etý usynyldy.