Jol-patrýldik polıtsııa reıd kezinde arnaıy buıryqty kórsetýge mindetti me

ASTANA. QazAqparat  - Búginde Qazaqstanda kólik júrgizýshilerin sebepsiz toqtatýǵa zańmen tyıym salynǵan. Degenmen, arnaıy reıd aıasynda jol-patrýldik polıtsııa qyzmetkerleri kez kelgen kólikti sebepsiz toqtata alady. Osyndaı jaǵdaıda tártip saqshylary buıryqtyń kóshirmesin kórsetýi tıis pe? QazAqparat tilshisine suxbat bergen QR ІІM Ákimshilik polıtsııa komıteti tóraǵasynyń orynbasary Talǵat Musaqanov osy máseleni naqtylap berdi.

"Negizi, aldymen, shuǵyl profılaktıkalyq sharanyń ótkiziletindigi týraly buqaralyq aqparat quraldaryna xabarlama berilýi tıis. Alaıda, kólik urlyǵyna qatysty reıdter týraly aqparat aldyn ala berilmeıdi. Biz urlanǵan kólikke uqsas barlyq mashınalardy toqtatamyz. Máselen, shuǵyl málimette qyzyl "Mıtsýbısı Padjero" dep kórsetilse, oǵan uqsas barlyq kólikter toqtatylady. Osy ispetti izdestirý sharalary kezinde jol-patrýldik polıtsııa qyzmetkerleri arnaıy qujatty kórsete almaıdy. Biz de olarǵa taratyp úlgermeımiz", - deıdi Talǵat Shaımardanuly.

Onyń aıtýynsha, kez kelgen jaǵdaıda "102"-ge qońyraý shalyp, reıdtiń bar-joǵyn bilip alǵan artyq etpeıdi. Sebebi saqshy reıdke qatysty buıryqtyń kóshirmesin ustaýǵa mindetti emes. "Sosyn olar (jol-patrýldik polıtsııa - avt.) basqa "OPM"-dy (shuǵyl-profılaktıkalyq sharany) aıtady da, toqtata beredi. Ondaı bolmaıdy. Demek, aryz jazyp, shaǵymdanýǵa bolady. Sonda biz ol qyzmetkerdi jazalaımyz", - dep atap kórsetti komıtet basshysynyń orynbasary.

Aıta keteıik, búgin Astanada ótken baspasóz máslıxatynda Talǵat Shaımardanuly EKSPO jabylatyn kúni jeke kólikpen júrmeýge keńes berdi.

Sondaı-aq, ol kórme aýmaǵynda eregisip qalǵany eki saqshy jumystan qýylǵanyn jetkizdi.