Jol mamandaryn daıarlaıtyn bilim baǵdarlamalary bir baǵytqa biriktirilip jatyr
Eldegi salalyq joǵary oqý oryndary men «QazJol» ǵylymı zertteý ınstıtýtynyń, Ǵylym jáne joǵary bilim mınıstrliginiń mamandary birlesip jol men kólik salasyndaǵy tapshy mamandardy ázirleıtin «Kólik qurylysy» atty jańa baǵyt qurdy. Oǵan avtojol men aerodromdar, temir jol, kópir, kólik tonnelderi men gaz-munaı qubyrynyń qurylysy sııaqty baǵdarlamalar kiredi. Baǵdarlama boıynsha bakalavrıat, doktorantýra granttary bólinedi. Qazir joǵary bilim salasyndaǵy osy ózgeristi jastar men mektep túlekterine tanystyrý úshin túrli kezdesýler, semınarlar ótkizilip jatyr. Maqsat – jol salasyndaǵy kadr tapshylyǵyn seıiltý.
Eldegi joldyń sapasy týraly syn aıtylǵan kezde saladaǵy jemqorlyq alǵa shyǵady da, maman tapshylyǵy deıtin másele osy úlken keseldiń kóleńkesinde qala beredi. Al jol salasynyń sarapshylary joldardyń sapasyzdyǵyna jemqorlyqpen qatar bilikti mamandardyń azdyǵy de keri áserin tıgizip jatqanyn aıtyp júr.
«Jol aktıvteri sapasynyń ulttyq ortalyǵy» mekemesiniń málimeti boıynsha, Qazaqstanda 157 myń shaqyrymǵa jýyq avtomobıl joly bar. Bul kórsetkish boıynsha álemde 32 oryndamyz. 20 mıllıon qazaqstandyqtyń menshiginde 4,5 mıllıon kólik tirkelgen. Osynsha ınfraqurylymǵa qyzmetke kórsetip, tıimdi basqaratyn mamandardy daıarlaý isi keıingi jyldary kádimgideı keri ketken. Qazir el boıynsha 8 joǵary oqý orny ǵana jol mamandaryn daıyndaıdy.
Jolmen baılanysty bilim baǵdarlamalarynyń azdyǵynan, bar bolǵan kúnniń ózinde keshendi aýqymy bolmaýynan elde jol ınjeneri, smeta ınjeneri, zerthanashy, asfalt tóseý operatory, mehanızator, arnaıy tehnıka mashınısi sııaqty mamandar tapshy. Eldegi búkil ákimdikterdiń shtat sanyn qosqanda kólik ınfraqurylymyn damytyp, kútip ustaıtyn 1 500-den astam maman jumys istep júr. Eń qyzyǵy, osy adamdardyń bárinde jol salasy boıynsha arnaıy bilimi ǵana bar.
Maman tapshylyǵynyń osynsha ýshyǵyp, býyndar úndestiginiń úzilip qalýyna avtojol mamandyǵy qurylys mamandyǵynyń japsarlas salasy retinde oqytylýy túrtki bolǵan.
Mysaly, 2023 jyly «Avtomobıl joldary men aerodromdar qurylysy», «Kópirler men tonnelder qurylysy» deıtin salaǵa tikeleı qatysy bar mamandyqtar boıynsha 278 adam ǵana joǵary bilim alyp shyqqan.
«Avtomobıl joldary men aerodromdar qurylysy» baǵdarlamasy boıynsha bıyl bilim alyp jatqan barlyq kýrs stýdentteriniń sany – 670 adam. «Kópirler men tonnelder qurylysy» boıynsha bilim alýshylardyń jalpy sany 84 stýdent qana.