Jol qurylysyna qarajat bólmeıtin oblystar bar – Marat Qarabaev
«Búginde joldardyń sapasy boıynsha kóp syn aıtylýda. Olardyń basym bóligi jergilikti jelige qatysty. Bıyl 4 200 shaqyrym jergilikti joldar jóndeýmen qamtylǵan, onyń 3 600 shaqyrymy jyl sońyna deıin aıaqtalady. Bul jumystarǵa bıýdjetten 384 mlrd teńge kózdelgen, onyń tek 81 mlrd teńgesi ǵana nemese 21 % jergilikti bıýdjetten bólindi», – dedi Marat Qarabaev Úkimettiń búgingi otyrysynda.
Bul rette keıbir aımaqtarda, onyń ishinde joldardyń jaı-kúıi eń tómen óńirlerde jergilikti bıýdjetten múldem qarajat qaralmaǵan.
«Atap aıtsaq, olar – Batys Qazaqstan, Qostanaı, Abaı, Shyǵys Qazaqstan, Mańǵystaý jáne Atyraý oblystary. Osy oraıda, tıisti ákimdikter joldardyń normatıvtik jaǵdaıyn kóterý úshin, jergilikti bıýdjetten qosymsha qarjylandyrýdy qarastyrýy qajet. Bólingen qarajatty tıimdi paıdalaný maqsatynda «Ulttyq sapa ortalyǵy» jasaǵan jumystardy qadaǵalaý asa mańyzdy. Saraptama júrgizýdiń tómen deńgeıi Qaraǵandy (51%), Aqmola (73%) jáne Qostanaı (79%) oblystarynda baıqalýda», – dedi M. Qarabaev.
Sonymen qatar nysandarǵa aıyna eń kemi 4 ret tekserý qajettigi bola tura, keı óńirlerde jyl boıy bir-aq ret tekserý júrgizilgen. Ol Jambyl, Túrkistan jáne Qyzylorda oblystarynda oryn alyp otyr.
«Ulttyq sapa ortalyǵy» qurylys materıaldarynyń 27 myń synamasyn alǵan. Onyń 2900-inde sáıkessizdikter anyqtalyp, olardy túzetý boıynsha tıisti sharalar qabyldandy. Merdigerler óz qarajaty esebinen 2 mlrd teńgege jumystardy qaıta júrgizgen.
Aıta keteıik, bıylǵy 11 aıdyń qorytyndysy boıynsha respýblıkadaǵy aqyly joldardan 26 mlrd 500 mln teńge qarajat tústi. Sońǵy ýaqytta tranzıttik aǵynnyń artýyna baılanysty, jóndelgen joldardy normatıvtik jaǵdaıda saqtaý úshin jol aqysyn qaıta qaraý jumystary júrgizilýde.
Sondaı-aq halyqtyń shaǵymdaryn eskere otyryp, osy jyly barlyq kúsh qurylysy uzaqqa sozylǵan 6 negizgi jobaǵa baǵyttaldy. Bul Taldyqorǵan – Óskemen, Qaraǵandy – Almaty, Merke – Býrylbaıtal, Aqtóbe – Qandyaǵash jáne Atyraý – Astrahan joldary.