Jol qozǵalysy erejesin 62 ret buzǵan túrkistandyqtyń isi sotqa joldandy
Elimizde jol qozǵalysy erejelerin óreskel buzýshylardy anyqtaý maqsatynda «Qorǵaý – qaýipti júrgizýshi» jańa baǵdarlamasy iske qosyldy. Atalǵan baǵdarlama arqyly Túrkistan oblysynyń polıtseıleri joldaǵy zań buzýshylyqtardy anyqtap, júgensiz ketken júrgizýshilerdi jaýapqa tartýdy qolǵa aldy.
Máselen, búgin polıtseıdiń planshetine Táýke han dańǵyly men Tynyshqulov kóshesiniń qıylysynda «Toyota» markaly kóliktiń jalǵan memlekettik nómir taqqany jáne tólenbeı júrgen aıyppuldary bary jóninde belgi berildi. Dabyl túsisimen polıtseıler atalǵan kólikti tekserý maqsatynda toqtatyp, qujattaryn qarady.
«Júrgizýshi kóligine jalǵan memlekettik tirkeý nómirin taqqan. Sondaı-aq, 62 zań buzýshylyq jasap, 1 mıllıon 600 myń teńgeden astam aıyppul boıynsha bereshegi bar bolyp shyqty. Atalǵan avtokólik aıypturaqqa qoıylyp, júrgizýshige QR ÁQBtK-niń 590-baby 4-bóligimen hattama toltyrylyp, sotqa joldandy. Polıtseıler tarapynan túsindirý jumystary júrgizildi», - deıdi Túrkistan oblysy polıtsııa departamentiniń baspasóz hatshysy Gúlnar Ábdijapparova.
Aıta keteıik, sońǵy 10 táýlik ishinde oblystyq polıtsııa departamentiniń jedel basqarý ortalyǵy men Túrkistan qalalyq polıtsııa basqarmasynyń polıtseıleri birlese otyryp, jol erejesin buzǵan 961 avtokólik júrgizýshisin anyqtady. Aıypturaqqa 148 kólik qoıyldy. Al, «Qorǵaý – qaýipti júrgizýshi» baǵdarlamasy aıasynda 180 avtokólik toqtatylyp, 109-y aıypturaqqa jetkizildi. 71 avtokólik júrgizýshisine túsindirme jumystary júrgizildi.