Jol qozǵalysyndaǵy quqyq buzýshylyqtar avtomatty túrde anyqtalatyn buzýshylyqtar tizbesinen alyna ma

<p>ASTANA. KAZINFORM &ndash; Jyl basynan jol-kólik oqıǵasy saldarynan 2 myńǵa jýyq adam mert boldy. Bul jaıynda Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan.</p>

«Statıstıkalyq derekterge sáıkes, 2024 jyldyń ótken kezeńinde elde 22 myńnan astam jol-kólik oqıǵasy bolyp, nátıjesinde 2 myńǵa jýyq adam mert bolyp, shamamen 25 myń adam dene jaraqattaryn alǵan»,- dedi birinshi vıtse-premer jaýabynda.

Onyń atap ótýinshe, qazirgi ýaqytta avtomatty rejımde jumys isteıtin arnaıy tehnıkalyq baqylaý quraldary men aspaptary jol júrisi salasyndaǵy mynadaı quqyq buzýshylyqtardy tirkeıdi:

- belgilengen jyldamdyq rejımin buzý;

- baǵdarshamnyń tyıym salý belgisine júrý;

- jol belgileriniń jolaqtaryn jáne tańbalaryn buzý;

- ruqsat etilmegen jerge toqtaý nemese toqtap turý.

«Osylaısha, jol qozǵalysyna qatysýshylardyń qaýipsizdigine tikeleı qaýip tóndiretin buzýshylyqtar avtomatty túrde tirkeledi. Búl quqyq buzýshylyqtardy avtomatty túrde anyqtalatyn quqyq buzýshylyqtar tizbesinen alyp tastaý jol-kólik oqıǵalarynyń ósýine alyp kelýi múmkin», - dedi Roman Sklıar.

Osyǵan deıin Qostanaı oblysynda polıtsııa jol erejesin buzýshylardy dron arqyly anyqtap jatqany týraly habarladyq.